Kakutu komatanga gopolisi Joseph Shikongo okwa ti ka shili mondjila ngele aakaleliki yopoveta yomoondjila, taya holama miihwa yo taya tondokele moondjila oku thikameka aauuna oohauto ngele dhi li po pepi.

“Ogo ngaa omukalo goku ya ngono? Aapolisi yamwe ihaya zala uundjatha wo kumonikila ko kule, shoka shanika oshiponga,” ta nyenyeta ngaaka.

Shikongo okwa londodha, ta ti uuna aakiintu naalumentu taya gwanitha po iilonga yawo naye shi ninge momukalo guli nawa, ihe haku iyakela moondjila oshoka oshanika oshiponga.

Kakutu komatanga natango okwa yelitha kutya oshigwana inashi kutha ko etumwalaka lye epuko, sho a po pi kutya aantu inaya shangwa we uutakete, ihe naya londodhwe ashike. “Inandi tya piteni momililo omitiligane, ne ta mu ipopile kutya onda ti inamu shangwa. Ngame onda ti, uupyakandhi mboka tau vulu okuindhindhimikilwa, ngaashi ekende lya tatuka, omatayela gapwa ominyonyolo no sho tuu, nau kale hau talika ko nawa” ta fatulula ngaaka.

Shikongo okwa po pi kutya epangelo olya thaneke okuya po nuuthano moondjila, unene mondjiila oonde, opo ku kondololwe okuhingilila.

Ta ti, omukalo goka otagu longithwa nale kiilongo ya putuka, onkene nayo oya landula mo.

“Otuna omukumo kutya ngele shoka sha tulwa miilonga, otashika shonopalitha iiponga yomoondjila oshoka itaku ka  hingililwa nuupu, naangoka taka hingilila otaka pewa egeelo lya kola,” ta fatulula ngaaka. 

 Kakukutu komatanga okwa kumagidha wo aalongithi yoopate ya gwanithe po oompango opo yaa pewe egeelo.

Ta ti, mboka itaaya iyutha koompango otaya pewa egeelo, oshoka otaya ningile iinima owina.    – vkaapanda@nepc.com.na