ONGWEDIVA – Kakutu komatanga gopolisi Joseph Shikongo okwa ti ombelewa ye oya kala nokulopotelwa aapolisi itaaya gandja omayakulo ga pumbiwa koshigwana, unene mboka yi iyelayela yoyene yi iningi “ooboosa” (aahona) yiifundja.
Shikongo okwa popi ngaaka esiku lyoshigongi shaakuluntu yoopolisi sha ningwa Omaandaha goshiwike shika kOngwediva moshitopolwa shaShana.
Oshigongi shoka hashi ningwa omumvo kehe, ohashi ningwa okukundathana ekandulepo lyomaupyakandhi ga yolooka taga indjipalekitha iimbuluma oshowo kehe shoka tashi shunitha iitopolwa monima.
“Okuza omumvo gwa yi, opolisi oya ndhindhilike iipotha yiimbuluma yi li 110 551, moka mwa kwatelwa omayeko, omakwatokoonkondo, omahepeko gomomagumbo, omadhipago, omayako giiyenditho niimuna, iingangamithi nomateyo gomagumbo nuufuthi,” ta fatulula ngaaka.
Shikongo okwa popi kutya oshitopolwa shaKhomas osho sha ndhindhilikwa shi na iipotha yi li pombanda no32.5% taku landula oshitopolwa shOshana, Otjozondjupa oshowo Erongo no11.3%, 8.3% oshowo 8% melandulathano ndyoka.
Ta gwedha po kutya iitopolwa Kavango West, Kunene, oshowo Omaheke oyo ya ndhindhilikwa iipotha iishona yi na o1.5%, 3% noya 3%, ya landulathana.
“Aapolisi naya gwanithe po iilonga yawo, naya gandje omayakulo koshigwana ongiinakugwanithwa yawo, ihe kaku ngwanyagula oshigwana,” ta nyenyeta ngaaka.
Minista gwiikwameni negameno lyokoongamba Albert Kawana okwa ti iigongi yi li ngaaka oya simana noyi na okusimanekwa oshoka ohayi gandja omalongo gongushu noga pumbiwa okulundulula onkalo inaayi uka.
“Shoka sha kundathanwa nena mpaka nashi ka tulwe miilongo opo ku ningwe omalunduluko mpoka pwaa na elongelokumwe oshowo mpoka pwa pumbwa uuyelele mbuka muuministeli awuhe wegameno,’’ ta po pi ngaaka.
Kawana esiku ndyoka okwa kumagidha aaleli yiitopolwa ya tsikile okulonga nuudhiginini nokutotha mo aluhe omaupyakadhi ge ya taalela opo ga kandulwe po.