ONGWEDIVA – Aanambelewa yopolisi mewiliko lyakakukutu komatanga gopolisi yaNamibia oya gandja omakwatho kaantu yeli monkalo yoluhepo moshitopolwa shaShana.
Kakukutu komatanga gopolisi Josef Shikongo esiku ndyoka okwa ti, oshikando shika oya gandja iikulya yongushu N$30 000.
“Etanga lyopolisi ohali gongele oshimaliwa shoka hatu iyamba okuza moondjato dhetu yene nelalakano okuyambindhindha kehe ngoka e li monkalo itaayi hokitha,” ta po pi ngaaka.
Shikongo okwa kumagidha ayehe ya pewa omayambindhindho esiku ndyoka opo ya kwate iikulya yawo nawa, yaa kondjelwe yo yaa landithwe po.
Ofamili yameme Sylvia Shaduka mOmatando mOngwediva oya ningi aanelago okutothwa mo kosheendo shopolisi sha kwayelwa komeho kukakakutu komatango gopolisi nokuyambindhindwa noompumbwe dhomegumbo, dhogongushu yili poN$10 000.
Esiku ndyoka aanegumbo oya hukula ehodhi kenyanyu sho ya pewa omagano ngoka molwashoka oya taalela onkalo ondhigu molwondjala noluhepo.
“Otuli megumbo tuli omugoyi kumwe, otwa kala noku hupa shokadhila oshoka kape na ngoka e na iiyemo. Ngame inandi thika natango momimvo dhoku kwata openzela,” Shaduka ta po pi nomahodhi taga pononoka poompanda.
Ta ti, oyuuvite nawa sho ya yambindhindhwa ngaaka.
Laurencia Nghidengwa gwomomukunda Oshuulo ngoka egumbo lye nalyo lya dhimbulukiwa okwa ti, oyo aanelago oshoka hayo ayeke ya taalela onkalo ndyoka, ihe oya totha mo ya mono omayambindhindho.
“Otwa pandula, ota tu indile natango shi ningilwe yakwetu yeli monkalo ngaashi twa kala mu yo,’’ ta po pi ngaaka.
Osenda yaanona ye na uulema yedhina Frans Aupa Indongo kOkandjengedi mOshakati, oyo yimwe yomwaamboka ya mono omayambindhindho ngoka.
Osenda ndyoka yina aanona yena uulema uukwatya wa yooloka oya li ya tothwa mo oyo yimwe ya pumbwa omakwatho moshitopolwa noya pewa iikulya, omizalomwa nomakumbatha. Iinima ayihe kumwe oyi na ongushu yoN$10 000.
Omuyakuli gwaanona mboka posenda mpoka Aili Shilongo, esiku ndyoka okwa holola enyanyu sho ya yambindhindhwa naayihe mbyoka ta ti, oya kala mombumbwe.
“Otuna aanona ya thika po30, onkene shoka twa mono nena mpaka otashi ke tu yambindhindha noonkondo,” ta pandula ngaaka.
Shilongo okwa ti, oye li mpoka ye li nena omolwa omayambidhindho ya kala noku mona okuza mpeya naampeya onkene otaya pandula.