Charles Ndeumane
OKAKWA – Omupeviminista wuukakwashikekookantu Bernadette Maria Jagger okwa londodha aavali naatekuli yuunona ha wu mono openzela ya longithe iimaliwa mbyoka oku gwanitha po oompumbwe dhaanona, opo kaa wu lale naasamane lelalakano lyo ku mona oshimaliwa.
Jagger okwa popi ndhoka pethimbo a li moshigongi naanamukunda yomOkakwa moshitopolwa shaHangwena mEtiyali, moka a li ta popi kombinga yo ku longitha iimaliwa yopenzela nuuhasha. Uuministeli owi ipyakidhila no ku gandja omalongo ngoka miitopolwa iikwawo yoshilongo.
Jagger okwa gandja uusama kaantu ayehe mboka ha ya mono iimaliwa yopenzela ashike oha ye yi longitha minima kaa yi na oshilonga ngaashi oku nwa omalovu, ashike okwa dhenge omuthindo unene puunona wuukadhona, ta kumagidha aavali naatekuli mboka ye na uunona wuukadhona ha wu kwata openzela opo ya gwanithile po uunona mboka oompumbwe dhawo, ta ti ngele hasho ota shi vulika uunona mboka wu ye miihulo naasamane aanene opo wu imonene iimaliwa wu igwanithile po oompumbwe ndhoka.
“Iimaliwa yopenzela oya nuninwa mboka ye yi shangelwa, na ya mone uuwanawa wiimaliwa mbyoka.
Ngele uunona wuukadhona ina wu gwanithilwa po oompumbwe dhawo oto mono ashike ta wu yi miihulo naanamane opo wu pewe iimaliwa.
Aasamene ha mu yi miihulo nuunona wosikola ta mu wu heke niimaliwa, alikana etheni uunona wosikola,” osho Jagger a popi ngaaka.
Okwa ti uuministeli owu shi kutya opu na aantu ha ya kongolola uunona, naamboka kaa wu shi waakwanezimo, unene tuu uunona wUukwankala, eta ye wu ndumbile momagumbo gawo opo ye wu shangitha openzela, ashike iimaliwa mbyoka oha ye yi longitha ashike moompumbwe dhawo yene.
Anuwa moshitopolwa shaHangwe omo unene muna aantu ha ya indumbile uunona wUukwankala opo ya lye iimaliwa yopenzela medhina lyawo.
Nonande opu na omufofodholo gwa ihanena oshilongo kutya uunona ta wu mono iihuna iha wu shangithwa we openzela, Jagger okwa ti uuministeli ina wu ninga nale etseyitho ndyoka, ta kumike aantu yena uunona woludhi ndoka ye wu shangithe openzela.
Okwa gwedha ko ta ti opu na omaludhi goopenzela ga yooloka onkene aantu na ya kwashilipaleke kutya oya gwanitha po iipumbiwa mbyoka ta yi pulwa opo yi ishangithe nenge ya shangithe uunona openzela. Openzela yuunona ta wu mono iihuna ota yi pula uunona wu kale kohi yoomvula 18, yo aakuluntu yawo na ya kale kaa ye na iiyemo,” Jagger ta ti.
Uuministeli owa ti owi ota wu ningi oompangela dhoku gandja omakwatho gopashimaliwa goBasic Income Grant ngaashi sha kala noku pulwa kaaleli oshowo aahwahwameki oyendji. Jagger okwa ti oshiketha shiikulya yoshikukuta shoka sha li ha shi ithanwa oFood Bank osha kuthwa po, ngashingeyi osha ningwa po oBasic Income Grant yoshimaliwa shoondola N$600 shoka ha shi pewa omagumbo gamwepo.
Okwa ti uuministeli ota wu pangele oku andjakaneka oBasic Income Grant koshigwana ashihe. Ngashingeyi eindilo lyoku tula oBasic Income Grant oyi li mokambinete.