Aakalimo yomoshitopolwa shaShakati otaya nyenyeta sho ya tegelela uule wethimbo ye li momushololondo gomaindilo gomahala.
Kundana okwa yi moonkundathana naakalimo yamwe, mboka ya gandja omanyanyeto gawo, sho ya ningi omaindilo omimvo heyali dha pita, ihe sigo onena inaya pewa omahala.
Omukiintu gumwe gomOShakati edhina lye, lyi shiwike koshifo kundaneki shika okwa ti, okwa kala mOshakati omimvo dha pita 20, ihe sigo onena ina mona ehala ndyoka ta ithana lye mwene, nonando a kambadhala okuninga omaindilo melelo lyondoolopa yaShakati.
“Ano mboka ya mona omahala oyo yeni? Yamwe oya ningi omaindilo hugunina kungaye ihe oya mona nale omashala. Nenge ondina mpoka nda ninga epuka nenge inaandi gwanitha po shoka tashi pulwa,” ta pula ngaaka.
Ta ti, okwa kala ta ningi omapulapulo koombelewa dha kansela kutya oshike itaa pewa ehala lye, ihe anuwa oha yamukulwa kaanambelewa kutya nategelele ashike, ehala ote li mono.
“Oomvula odhuuka komeho unene, tse otwa hala omalukalwa getu yene. Aakuluntu yetu oya hala tuthige po omagumbo gawo,” ta nyenyeta ngaaka.
Selma Shigwedha okwa ti, uupyakandhi mboka okwa kala nawo omimvo ne, sigo onena ina u kandulwa po.
“Onda li nda ningi omayindilo melelo lyondoolopa yaShakati omimvo ne dha piti, ihe sigo onena inandi mona eyamukulo lya sha, nonando yakwetu yamwe ya mona omahala,” ta popi ngaaka.
Ta gwedhapo kutya uupyakadhi mboka haye ashike euna, ihe oyendji otaya nyenyeta omahala taga gandjwa ashike kaantu yamwe.
“Ota tu kala ta tu futu oohila sigo unake? iimaliwa ta tu futu oyindji unene. Omaluvalo getu nango otaga indjipala onkene ita tu gwanamo we moohiila,” ta popi ngaaka.
Shigwedha ta nyenyeta kutya uupyakandhi mboka nau kandulwe po, oya hala omalukalwa gawo yene.
Omupopiliko gwelelo lyondoolopa yaShakati Katarina Kamari ka kwali ta vulu okutya ko sha oshoka okwa li e li moshigongi ethimbo ndyoka. Ongodhi ya Mayola Leonard Hango yo inayi yamukulwa.
-vkaapanda@nepc.com.na