Aakalimo yomomukunda Oshikutshatshipya nomomudhingoloko gwaEtayi oya longo nuudhiginini sho ya tungu okapangelo okashona, opo ya kale taya mono omayakulo guuhaku.
Aakalimo mboka anuwa oya kala haya monene omayakulo mehala lya nyayika, mongulu yotango yongeleka yaOshikutshatshipya.
Nonando aakalimo yakambandhala ngaaka oya shuulile ondjilakati sho ya nyengwa okugwanitha po omayakulo agehe ngaashi omeya nolushuno oshowo olugumbo.
Minista Kalumbi Shangula ngoka oye a patulula okakilinika hoka okwa yambindhindha noshimaliwa N$5000 opo ya tsikile naampoka ya huulila.
Shangula sho ta pandula iilonga ya longwa kaakalimo yomokunda Oshikutshatshipya okwa po pi ta ti, okakilinika hoka okape otaka ka yambidhidha oyendji yomomudhingoloko moka, oku ya konda omagulu oshowo okulongitha iimaliwa okuthika kiipangelo yokokule.
Ta ti, oshilonga shoka shalongwa koshigwana oshinene noshiwanawa sho ya tsakaneke epangelo ondjilakati.
Tagwedha po kutya epangelo olya kala notali tsikile okulongela oshilongo shalyo uuwanawa oshowo okugwanitha po oompumbwe nomayakulo goshigwana, ngaashi naana taya ka etelwa po aapangi.
“Oshitopolwa shOmusati ngashiingeyi oshi na iipangelo iinene yi li ine, oosenda dhuuhaku dhi li hamano, uukilinika owu li 41 omanga omahala haga talelwa po ethimbo nethimbo ge li 136,” ta ti ngaaka.
Ta ti shoka otashi ulike iiyimati yepangelo oshowo ohokwe nolukeno epangelo li na noshigwana shalyo.
Shangula epangelo olya kala nokuyambindhindha nomayakulo guuhaku moshilongo.
Oshigwana oshi na okugwanithilwa po oompumbwe ndhoka tashi pumbwa, okukaleka po omaundjolowele gawo, ” ta ti ngaaka.
Okwa li wo a po pi kutya iipangelo mbyoka yi li moshitopolwa shOmusati ohayi gandja wo natango omayakulo kaakalimo yokoAngola.
Kansela gwoshikandjohogololo Etayi Hans Haikali okwa li a holola euvonawa lyokakilinika hoka ka patululwa moshikandjohogololo shawo.
“Ehumokomeho otali ende lyu uka komeho, nomauwanawa otaga ende taga thiki po pepi. Aakalimo yomoshikandjohogololo shetu oya longo nuudhiginini okuya po nokapangelo haka yo itaya ka hinga we oondjila oonde taya ka konga uuhaku,” ta popi ngaaka.
Haikali okwa li a pandula aakalimo oshowo aanangeshefa mboka ya yambidhidha ngaaka, ta ti okakilinika otaka ka yambidhidha oyendji.
Martin Ashipala gwomomukunda Oshikutshatshipya okwa ti, itaya mana okuipandula.
“Onkundana ombwaanawa oyo ndjoka kutya itatu ka longitha we oshimaliwa shokulefa oku ka yakulwa kiipangelo yokokule. Okapangelo haka otake ke tu yambidhidha lela,” ta popi ngaaka.
Ta ti ota indile ashike epangelo opo lyi ya kongele ndohotola ta kalele, oshoka omasiku ngoka ndohotola ta ka kala ke po otaya ka thiminikwa okuya kiipangelo iinene. – vkaapanda@nepc.com.na