OSHAKATI – Aashingithi ya ningi omayindilo okukutha ombinga momauliko gomazimo Totem Expo inaya nyanyukilwa ondando tayi futwa pomweelo oshoka anuwa otayi shololitha ookasitoma dhawo.
Elelo lyondoolopa lyOshakati olya koleke kutya aakuluntu pomweelo otaya futu N$40 momuntu omanga okanona taka futu N$20.
Omauliko gomazimo ga shuwika nawa Totem nuumvo otaga ka tameka momasiku 30 Mei sigo gaheyali gaJuni. Otaga ka ningilwa mokapale kemanguluko kOshakati moka haga ningilwa shito.
Rosalia Shoolongo ngoka a ningi eyindilo okukalanditha iikunwa yomaludhi agehe osho wo iikulya ota nyenyeta kutya oshimaliwa tashi futwa pomweelo oshindji momuntu gumwe.
“Hakehe gumwe ta hala okufuta N$40 e ye a nwe obiila N$30, omanga ta vulu oku yi landa N$25 pehala mpoka itaapa futwa,” ta nyenyeta ngaaka.
Ta ti, oondando oye dhi londeka nale kiilandithomwa yawo, onkene ookasitoma itadhi hala okufuta ondilo ishewe pomweelo.
Ta pula elelo lyondoolopa lyi talulule po pondando mpoka omanga omasiku ngoka inaaga adha.
Simon Petrus a ningi omaindilo gokatala okwa ti, naye ita tsu kumwe nondando ndjoka.
Ta ti, noTrade Fair yOngwediva ihayi pula iimaliwa yi thike mpoka pomweelo yo oyo ne onene yi vule oTotem Expo.
“Se sho twe ya mokapale otwe ya okukonga oshimaliwa, ihe nena ngele kondando otamu sitele ko otamu tidha ookasitoma dhetu,” ta ti ngaaka.
Nonando pe na ngaa mboka taya ka thika, itaya ka holoka ngaashi sha li shi na okukala opo ya vule okulanditha nawa.
Petrus ota ti pondando napu talululwe.
Aalandithi oya indile wo elelo lyi longekidhe oTotem Expo nawa, ihe hangaashi ekopi lyaMayola lya li lya longekidhwa ndyoka lya li ko mehuliloshiwike.
Tulimuwo Amupolo okwa nyenyeta kutya uundjugo kakwa li tau silwa oshimpwiyu, omalamba ohaga dhimi mbala taya thigwa momilema omanga inaaya mana okulanditha.
“Ihatu tseyithilwa kutya otaku ka dhimwa, ohatu mono ashike tu li momilema, shoka hashi kala sha nika oshiponga oshoka ookalyamupombo ohaya pewa ompito ya longe iilonga yawo,” ta nyenyata ngaaka.
Ta ti oya futa iimaliwa yawo ihe omayakulo okuza kelelo lyondoolopa itaga hokitha nando.
Omupopiliko melelo lyondoolopa lyOshakati Katarina Kamari okwa ti, elelo olye ya po nondando ndjoka okumona mo wo oshimaliwa shomayakulo ngoka taya gandja mehala moka.
“Omauliko gomazimo otaga kala ga longekidhwa nawa, okutameka kolusheno, uuyogoki, egameno nosho tuu shoka tashi pumbiwa, onkene ayihe mbyoka otayi ka pula oshimaliwa,’’ ta popi ngaaka.
Kamari okwa popi kutya itashi kwatha sha okulongekidha omauliko gomazimo ngele nayo otaya kana.
Kamari okwa popi kutya omauliko gomazimo niikwapindi gaShakati ngoka hagi ithanwa Totem haga kala ko omumvo kehe, oga tamekele okuza momumvo 2012.
“Omaulikilo ngaka otaga ka gandja ompito ombwaanawa kaanangeshefa aashona okushingitha osho wo egandjo lyomauyelele okuza komauministeli gi ili nogi ili nosho wo kiikondo yepangelo naambyoka yaa shi yepangelo,” ta ti ngaaka.
Okwa fatulula kutya okatala kiilandithomwa iishona mwa kwatelwa iikulya niikunwa oke na N$1 500, kiikulya yOshiwambo N$500 okapana N$1 500 komahangano nooministeli dha yooloka N$5 000 omanga mboka tau ka kala kondje yokapale N$750.
Momaulikilo ngoka otamu ka kala omathigathano ogendji.
Ta ti, otamu ka kala aaimbi kamana nosho wo ethigathanopo lyokakadhona dhingi kaTotem.
Kamari ota kumagidha kutya kehe ngoka ku shi nawa ezimo lyoye nenge ku shi sho hali itanga, onawa wu ye komaulikilo ngaka, wu pulakene nkene hali tangwa nosho wo okuuva nawa ondjokonona yalyo.
-vkaapanda@nepc.com.na