Aakuthimbinga taya landitha komaudhano go-NDF mokapale kOshakati, otaya nyenyeta kutya oya pulwa ondilo okufutila omahala, yo ongeshefa itayi ende ngaashi kwa li ya tegelela.
Omaudhano giilyo yetanga lyegameno ya za oshilongo ashihe oga tameka okuza momasiku 4 Aguste sigo omo 11 Aguste nuumvo.
Omaudhano gamwe otaga dhanenwa kEmbandu omanga yamwe taya dhanene kOngwediva Tennis Court.
Nonando yamwe otaya nyenyeta kutya iipindi yawo otayi shongola, yamwe oya holola enyanyu omolwomangeshefelo taga ende nawa.
Maria Shitaatala ngoka ta landitha iikunwa ya yooloka oshowo onyama okwa ti, sigo opaife iimaliwa mbyoka a longitha ine yi mona.
“Otwa pulwa N$2 000 mehala. Ano otwe ya okukonga oshimaliwa nenge otwe ya oku shi gandja kepangelo? Iimaliwa mbyoka oyindji noonkondo, okwa li ndi shi otandi yi mono mo ihe onda kana thiluthilu,” ta popi ngaaka.
Shitaatala okwa ti oshimaliwa shoka a landa iilandithomwa ye, kumwe okwa longitha N$10 000, ihe okwa longo ashike oshimaliwa sha thika N$4 000 okuza esiku lyotango sigo onena.
Ta ti, esiku lyotango okwa li ehwepo.
Ihe Olyomakaya nOsoondaha ongeshefa okwa li tayi shongola, omanga Omaandaha sigo 12h00 a li a mono ashike ookasitoma mbali.
Omulandithi gumwe ngoka inaa hala okupopya edhina lye okwa ti, omangeshefelo otaga ndonda.
“Iimaliwa twa futa omahala ngaka oyindji noonkondo. Ohandi landitha omauliko giipindi ogendji, ihe inandi pulwa natango oshimaliwa shi thike mpaka,” ta nyenyeta ngaaka.
Ta ti, okwa li ya pumbwa okupewa ompito yokukonga oshimaliwa onga aakalimo yomondoolopa oshoka oye ya okutalelwa po, ihe oyo ishewe ya gandja po iimaliwa yawo.
Ta gwedha po ta ti, omumvo tagu ya ita kutha ombinga nando oshoka nuumvo oya kanitha oshindji.
Martin Ndeunyema okwa ti, sigo onena omashingithilo ge otaga ende nawa, nonando itaga ende ngaashi esiku lyotango.
“Itandi tsu kumwe noshimaliwa sha pulwa okufutila ehala, oshindji unene. Uutala ohau ningwa nelelakano lyokukonga oshimaliwa, ihe hakugandja oshimaliwa,” ta popi ngaaka.
Omukwateli komeho guudhano mboka Medusal Shimanya okwa ti, shoka sha kuthitha etokolo lyoshimaliwa shi thike mpoka, omakondjelo goompito.
“Aakuthimbinga oyo yene ya li ye ya po noondando, mboka kwa li ye na ondando N$2 000 oyo kwa li oyendji kwaamboka kwa li ya gandja ondando yi li pevi,’” ta fatulula ngaaka.
Mboka kwa li itaaya vulu oshimaliwa shoka ngeno oya konga ashike omahala kEmbandu hoka kwa pula ashike N$500 nokOngwediva hoka inaaku pula nando oshimaliwa.
Shimanya okwa ti, ope na yamwe mboka ye ya okupula ko iimaliwa yawo, sho ya ninguluka.
“Sigo onena ope na yawe opo yeya mo, notatu tsikile okutaamba mboka ye na oshimaliwa,” ta popi ngaaka.
Mokapale kaShakati omu na uutala wu li 20, nokwa li ya mono omayindilo ge vule 800, gaantu ya hala okukutha ombinga.
vkaapanda@nepc.com.na