OSHAKATI – Elelo lyondoolopa yaShakati olya ti, olyi li metifa okuninga omapekaapeko nkene lyi na okugandja omahala kaashingithi ayehe yOmaandaha nEtitano mboka haya landithi kondje yOmatala omanene gaShakati “kOshipwataapwata”.

Omugandji gomauyelele melelo lyondoolopa yaShakati Katarina Kamari okwa ti, oya ndhindhilike kutya aashingithi yamwe ohaya zi koondolopa ndhilwe omolwa ookasitoma ondhindji kOshakati,” ta fatulula ngaaka. “Nonando oondolopa dhilwe nadho ohadhi ningi omashingithilo gomasiku galwe moshiwike ngaashi ngoka, Oshakati ohayi uudha yi vulithe oondolopa ndhoka.

Ta gwedha po ta ti, natango oya ndhindhilike kutya aantu oyendji oye na ohokwe nehalo lyokushingitha, nonando elalakano lyoku ya po nehala ndyoka okwali lyopakathimbo ashike, okukwathela aashingithi yomomapandaanda. 

Kamari ta ti, mboka taya pula omasiku ngoka gaali ga gwedhelwe, itashi ningwa oshoka otashi yi moshipala noku shunitha monima oongeshefa dhaamboka yeli meni lyomatala.

“Aalandithi yomeni lyomatala ohaya futu kelelo lyondoolopa komwendhi, onkene oongesha dhawo odhina okugamenwa, okukalekwa po noku simanekwa,” ta po pi ngaaka. Soini Shifugula ngoka ta landitha iikutu iikulu momatala okwa ti, oya thinana, itaya monika we nawa kookasitoma. 

“Ta ti, paife oyeli mokatala yeli yane, oshoka kape na omahala, oshike omahala itaaga gwedhelwa oshoka aantu oyendji, otuli mumwe unene,” ta nyenyeta ngaaka. Shifugula okwa ti, kehe gumwe okwa hala okushingitha a mone sha shokuhupitha aanegumbo ye.

Mathew Shilongo ngoka naye ta landitha iikutu ota pula kutya “oshike elelo lyondoolopa itaali gandja ashike epitikilo kwaamboka yomondoolopa yaShakati oyo ya shingithile mo? Mboka haya zi koondoloopa ngaashi Outapi, Okahao, Ondangwa naya kale koondoolopa dhawo, oshoka paife otwa thinana, omahala inaga gwana nookasitoma kadhi po we,’’ ta po pi ngaaka.

vkaapanda@nepc.com.na