Charles Ndeumane
Yimwe yomoongundu dhopapolitika ndhoka dhayile koSouth Africa oshiwike shazi ko dhi ka tale nkene uumbapila waahogololi tawu ndulukwa po anuwa inayi panda oshoka uuyelele owundji owa holekwa.
Nonande okomisi yomahogololo yaNamibia oya pititha etseyitho kutya oongundu adhihe dhili 18 ndhoka dha kalelwa po lyiilyo yadho koSouth Africa odha koleke nokushaina kutya uumbapila owa ndulukwa palandulathano, yamwe yomaakalelipo yoongundu oya ti inaya pewa ompito yoku ninga omapekapeko noku kwashilipaleka kutya kapu na uulingilingi wu longithwa mendulukepo lyuumbapila woku hogolola.
Omunashipundi gwongundu yoAction Democratic Movement (ADM) gwopashigwana Paulus Kambonde okwa ti okomisi oya ndopa oku ulika uukwashili mboka ya ti otawu longithwa moku ndulukapo uumbapila woku hogolola oshoka aakalelipo yoongundu ina ya pewa uuthemba nompito ya tale nkene uumbapila mboka tawu ndulukwa po okuza petameko sigo okehulilo.
Anuwa aakalelipo yoongundu oyali haya kalekwa mongalashe ya tegelela oku ithanwa yaye mokambelewa moka hamu ndulikwa
“Otwali tuna okuzako moshiwike tashiya ashike ngame ondaziko manga oshogongiilonga inashipwa oshoka sho twali twa tegelela hasho twa adhako hwiyaka. Okwa nda tegelela tu yelithilwe muule tu uveko lela oshinima oshili paushili ashike ompito ndjoka inatu yi pewa. Mombelewa moka hamu ndulukwa uumbapila woku hogolola ohatu ethelwamo ashike ominute dhili lwopumbali tse otatu pulwa tuzemo. Ina tu pitikwa oku kwata iinima nenge oku kutha omafano,” Kambonde ta ti.
Onguungu 18 ndhoka dha tumu aakalelipo yadho koshigongiilonga shoka omwa kwatelwa oAction ADM, AR, APP, All People’s Party, Body of Christ, IPC, noLPM, nadhikwao dhilwe.
Ongundu dhili ndatu ndhoka dhali shiikuthamo momusholondondo gwoku kutha ombinga moshigongiilonga shoka koSouth Africa dhoPopular Democratic Movement (PDM), Christian Democratic Voice Party oshowo oRepublican Party of Namibia nadho odha ndhidhilike euvathanotsokumwe kombelewa yokomisi yomahogololo moWindhoek momasiku 22 Kotomba 2024.