Charles Ndeumane

Ooyene yoongeshefa dhokuteleka ndhoka dha li dha teleke koshituthi shEtotha Carnival oya ti oya loloka okutegelela ofuto yawo ndjoka ya li ye na okupewa kuuministeli muule womasiku 30 ashike ngashingeyi oomwedhi ndatu ya tegelela.

Omukiintu gumwe gwomooyene yoongeshefa ndhoka dha hala oofuto dhadho ngoka edhina lye itali vulu okutumbululwa okwa ti uuministeli womudhingoloko nomapashiyono owa li wu na oku ya futa muule womasiku 30 okuza kesiku ya longa iilonga mbyoka ngaashi anuwa oveta tayi ti, ashike ngashingeyi oomwedhi ndatu inaaya futwa.

“Oomwedhi odha ninga odhindji inaatu futwa ndele paife otu na uumbanda nomalimbililo kutya ngaashi oshiniina shu uka komahogololo ngeyi otashi vulika tu kale inaatu futwa, unene ngaa shampa omahogololo ga pu inaatu futwa opuwo ngawo ngiika natu dhimbwe,” osho a popi ngaaka.

Omunangeshefa omukwawo ngoka naye a hala ofuto ye ngoka naye a tindi edhina lye li longithwe okwa ti iilonga mbyoka oye ya tula moondjo oshoka iilongithomwa yimwe mbyoka ya li ya longitha oya li ye yi indila opo ye yi fute ngele nayo ya futwa kuuministeli.

“Oongeshefa dhetu oonshona, kadhi shi omahangano omanene ngoka ge na iilongitho yago gene. Iilongitho yimwe mbyoka twa longitha otwa li twe yi lya omikuli, ngashingeyi ooyene yawo oya hala oofuto dhawo ndele katu na iimaliwa. Aaniilonga mboka ya li ye tu kwathela otaya pula oofuto dhawo,” ta thamuna ngaaka.

Anuwa uuministeli owa li we ya uvanekela kutya otau ya futu manga omasiku 25 gomwedhi Sepetemba inaaga thika ashike inawu gwanitha po euvaneko ndyoka. Ngashingeyi anuwa uuministeli ihawu yamukula we omapulo gaateleki mboka owa mwena ashike. Omupopiliko guuministeli womudhingoloko nomapashiyono Romeo Muyunda okwa ti ndhoka dha popilwe kuuministeli konima yiiwike iyali kutya uuministeli owu uvite ko omakemo gaateleki notawu ya pula ya kale netegamaneo inadhi lunduluka, anuwa uuministlei owa tameka okufuta. –mrndeumaneraycharles@gmail.com