WINDHOEK – Omapopyo otaga ti aavali yamwe unene miitopolwa yokomikunda ohaya holeke aanona yawo mboka ye li omakishi inaya hala ya monika koshigwana omolwomitotolombo nen-gwanyagulo hayi etithwa konkalo yawo. Okutala konkalo ndjika tayi inyenge moshigwana, ehangano ndyoka li lile po omakishi otali indile Epangelo li kwathe mokugandja omauyelele gomondjila kombinga yonkalo nuukalinawa womakishi. Ehangano ndika, Namibia Association Albino Trust (NAAT), otali ti aanona omakishi miitopolwa yomomikunda moNamibia ohaya holekwa nolundji ihaya pitikwa okuya kosikola nenge okunyanyukilwa pamwe naantu yakwawo megumbo nenge pomukunda. “Otwa tsakaneka omanyenyeto okuza mOshikoto kutya aanona omakishi ohaya yongolwa mo maantu yakwawo. Ngele megumbo omwe ya aayenda, aanona mbaka ohaya tumwa po nenge poompito dhimwe ohaya lombwelwa ya kale omutumba konima yegumbo. Inaya talika ko lela ongaantu yi ihwapo. Shika nashi monenwe ehulilo oshoka aantu ye na onkalo ndjika yoshipa oye na oondunge noya pumbwa esiloshisho lyowina,” osho omupresidende goNAAT, Josef Ndinomupya ta ti. Nonando Ndinomupya ina vula okuholola kutya iiningwanima ingapi yoludhi nduka ya lopotelwa ombelewa yawo, ota ti kuyele omwedhi nguka, ombelewa ye oya tseyithilwa omangwanyagulo ngaka okuza moshitopolwa Oshikoto. Okwe shi koleke wo kutya shika kashishi oshikando shotango ombelewa yawo tayi mono omanyenyeto goludhi nduka moshitopolwa shoka. Nelalakano okukandeka omitotolombo dha kundukidha onkalo yomakishi, Ndinomupya ota ti egandjo lyomauyelele koshigwana unene shi nasha noshipungo tashi ningilwa omakishi, otali ka ningwa okutameka muMei. Oshikonga shendungiko nokupashula oshigwana kombinga yoompumbwe dhawo otashi ka ningwa mOshana, Oshikoto, Omusati, Kunene, Omaheke, Ohangwena, Caprivi nOtjozondjupa muMei naJuni. Miitopolwa yomuum-bangalantu woshilongo omu na omuyalu gomakishi 816 mboka ya nyolithwa. “Pethimbo ndika (lyiikonga yendungiko), otatu ka indila nokukundathana naavali ya hulithe po omahepeko, eidhimbiko lyoompumbwe noshipungo komakishi, oku ya kumika ya fale aanona yawo koondohotola uuna ya koneka ye na iilalo nomaupyakadhi galwe goshipa,” Ndinomupya ta ti. Oshoka aantu mbaka oye na oshitopolwa sholwaala kaa shi mo moshipa, onkee ohaya ningi iihakanwa yelunduluko lyoonkalo dhombepo ngaashi okukwatwa kiilalo nekukuto lyoshipa, nangele inaya mona etonatelo lyopaunamiti ohashi vulika ya kwatwe kokankela yoshipa. “Okankela yoshipa oyo unene omukithi ngoka hagu tetula onkalamwenyo yomakishi. Onkee oku shi talela mOmulanduveta gwEpangelo gwaantu taya lumbu nuulema wontumba, otu na eiyuvo kutya otashi opalele okwiindila Epangelo lyetu, opo tu vule okuungaunga nawa nomaupyakadhi ga taalela aantu ye na onkalo ndjika moshilongo shetu.” “Otwa hala andola Epangelo lyaNamibia li gandje ekwatho kOshiketha molupe lwoshimaliwa N$300 000 opo ku tulwe miilonga Oshikonga shEpashulo nEpekapeko lyOompumbwe dhetu.” Ehangano oli uvite kutya omakishi ohaga hepekwa, noshinima shika oshi na okutalwa meendelelo okupitila mooproholoma dhoka tadhi nyangelwa oshimaliwa, notadhi lalakanene okulwitha omikithi tadhi hepeke aantu mbaka, ngaashi okankela yoshipa. Omvula ya zi ko, Ndino-mupya okwa ningile eindilo kEpangelo okupitila mOmbelewa yOmuprima-minista kutya omakishi ya ninge haya pewa oshimaliwa shopenzela/eyambidhidho. Eindilo ndika okwa li lya ziminwa konduko kutya aantu ye na onkalo ndjika ya nyolithwe omolweyam-bidhidho ndika. Omatalelopo ngoka ga thanekwa miitopolwa, aantu ayehe mboka ye na onkalo ndjika otaya ka nyolithwa nomadhina gawo otaga ka tumwa kUuministeli wUu-kalinawa nOpankalathano yOpashigwana, ku talike ngele otaya vulu okumonenwa ekwatho ndika. Onkee pehulilo lyiikonga, NAAT okwa hala oku-shilipaleka kutya omakishi agehe oga taambiwa ko nokukala nuuthemba mboka tau tyapulwa kAanamibia ayehe.