Omunangeshefa a tseyika nawa okwa li a fumvikwa mOlyomakaya. Oohapu dhomuselakadhi odha ti,
“Oto kala aluhe u na ehala momutima gwandje muholike gwandje. Omuholike gwandje okwa ya nombili, ihe nonando a hulu ko onda itaala kutya omuwa ota kala pamwe natse, noluvalo lwetu,”
“Oyendji oya kala nokutuma omatumwalaka gomagalikano, ngoka ga kala nokupa ndje omukumo omanga omuholike gwandje e li moshipangelo, otandi ti, onda pandula,” ta pandula ngaaka.
Ta ti, yamwe oya tumu natango omatumwalaka gomahekeleko omolwa inaaya vula okuthika, ihe shoka osha gwana natango.
“Onda hala okukumagidha aanona yetu kutya, eso ohali topola aantu, ihe onda hala mu kuthe oshiholelwa shiikombo uuna yu uvu olwaadhi, ohayi ningi okangunda. Inamu topoka, ihe kaleni mwiimwanga kumwe tamu ningi oshigunda shimwe, no tamuka tompola,” ta kumagidha ngaaka.
Aantu omayovi oyali ya gongala Olyomakaya ga z iko pegumbo lyomunangeshefa a tseyika nawa Johannes Akapandi Endjala, sho kwa li ye ya oku mu thindikila kegumbo lye lyaaluhe, pOkapya moshitopolwa shaShana.
Aanangeshefa ya yooloka okuza kiitopolwa ya yooloka moNamibia alihe, okwa li ya ndjokonona omunangeshefa ngoka momikalo dha yooloka.
Endjala okwa li ahulitha momasiku 23 gaJanuali, moshipangelo mOvenduka mepipi lyomimvo 58.
Omupevipresidente gwoshilongo Nangolo Mbumba momushangwa gwe gwa li gwa leshwa peha lye kuNgoloneya goshitopolwa shaShana Elia Irimari okwa ti, Namibia okwa kanitha ependafule, namwenyo mwaanawa oshowo omunangeshefa omunene,” ta ti ngaaka.
“Ethimbo lyekondjelo manguluko lyoshilongo shika, Endjala okwa li a kutha ombinga mokukondjela ombili yoshilongo shika, momikalo dha yooloka,” ta ti popi ngaaka.
Metumwalaka lyomahekeleko lya gandjwa komuPresidente omukulu Hifikepunye Pohamba, okwe mu dhimbulukwa onga omunangeshefa omunankondo, sigo a tulwa ponkatu mpoka a li.
“Onkandangala a dhana onga omunangeshefa oya kwathela okutunga oshowo okuhumitha komeho oshilongo shika, nokwa tseyika oshilongo ashihe,” ta ti ngaaka.
Omukokolipresidente Sam Nujoma okwa ti, Namibia okwa kanitha omukokoli ngeshefa oshowo omuleli omwaanawa.
“Endjala okwayambindhidha oyendji momukalo gokuhumitha komeho oongeshefa oshowo eliko lyoshilongo,” ta ti ngaaka.
Omukwaniilwa gOndonga Fillemon Shuumbwa Nangolo okwati, eso lyomunangeshefa ngoka olya thigipo omwaka.
“Omulumentu ngoka okwali omuntu gomwenyo omwaanawa, ngoka ena uukwatya wa pumba,” ta popi ngaaka.
Omunashipundi nale gwehangano lyo Namibia Chamber of Commerce and Industry (NCCI) Tomas Iindji, okwati okwaluluma keso ndyoka.
“Endjala okwadhana onkandangala onene mongeshefa, nokwa yambindhindha natango meliko lyoshilongo,” ta hokolola ngaaka.
Ta ti, oya kanitha omunangeshefa ngoka ali ena oshiho noshigwna oshowo omuyambindhindhi.
vkaapanda@nepc.com.na