Max Henrich
Ongwediva- Amen Combined School i li momukunda Onankali moshitukulwa shaShikoto otai pula ekwafo koshiwana opo shi vatele mokutunga omuhandjo wovamati, oshoyo ekulo lofikola.
Ofikola oi na ashike omuhandjo woukadona, novanafikola vahapu ohava ende lela oinano ile opo va dule okufika pofikola. Vamwe ova ninga eenghendabala opo va kale hava di pomaumbo opopepi nofikola, vo va dule okufika pefimbo kofikola omolwa oinano ile oyo hava ende.
Omukulunhufikola koAmen Combined School Aben Ambondo, okwa ti ovanafikola ohava ende lela oinano ile, ashike osho tashi etififa eenghono osheshi kutya natango ove na ashike omukumo, no inava twa ofikola okati. Ambondo ta ti ngeenge omuhandjo wovamati owa pu okutungwa ovanafikola aveshe otava ka mona eenhele momuhandjo.
“Eshi otashi ka hafifa ovanafikola vahapu opamwe novahongi vavo. Omuhandjo woukadona ou tu na po owa tungwa ashike okudilila meyambidido lovadali. Yoo ofikola oi yadi paife shaashi opa wedwa ondodo
10 no11.
“Ohatu indile lela moshiwana shi tu vatele opo tu dule oku tunga omuhandjo wovamati nekulo lokutelekela,” Ambodo tati.
Ambodo okwa tumbula kutya mo2016, ovali tava longo noudjuu shaashi pofikola opa li eengulu adishe dili nhee di na oipeleki ya pepwa ko komhepo, novali ashike hava longele momatungo aamona oixuna ngaha. Omatungo amwe okwali matilifa neenghono shaashi okwali e li pokuwa po. Ashike paife oya pwa okulonga. Ambondo okwa weda po kutya keshe tuu ou e na ehalo kufa ombinga metungo lofikola, na denge konomola tai lundula apa 0811277878.