OMAALALA – Job Amupanda okwa yambidida ofikola Omaalala Primary eshi a yandja oitungifo kofikola opo i tungilwe etala lovahongwa osho yo okulongulula onhele yokudanaukila ovanafikola.
Okwa hoololwa omudo wa dja ko eshi ovahongifikola nelelonongelo lofikola la kala omutumba oku mu hoolola.
Okwa ti kofikola Otanana Combined okwa tunga ko eengulu di li mbali osho yo ombelewa yokukala ovahongifikola.
Okwa weda po ta ti natango kofikola Limbandungila Combined i li moshitukulwa shaHangwena okwa tunga ko eengulu mbali.
Amupanda okwa popya ta ti naye okwa fikola pofikola Omaalala onghee okuudite etumba eshi a ningwa kaume kofikola oyo.
“Ongomunafikola mukulu wopofikola Omaalala ohandi twikile okuyambidida ofikola ei shaashi oya taalela omashongo a yooloka,” ta ti.
Okwa ti eshi osha fimana, nota shakeneke epangelo ondjilakati.
“Osha fimana ngeenge hatu yambidida eefikola molwaashi eshi otashi tu ovanafikola omukumo ve lihonge ngeenge ve na oikwafifohongo. Ovanafikola ovo ovaleli vokomongula,” ta ti.
Amupanda okwa pandula epangelo eshi la longulula eengulu pofikola tuu opo konima eshi kwa li oipeleki ya pepwa ko komhepo.
Efiku tuu olo Amupanda okwa popya novanafikola ndele te va tu omukumo opo ve lihonge nondjungu nokufimaneka ovahongifikola vavo.
Omukulunhufikola pofikola Omaalala Emilia Simeon okwa pandula Amupanda eshi a yambidida ofikola.
Okwa ti natango ofikola yaye oya taalela omashongo ngaashi oipundi inai wanena ovanafikola, oundjuwo va kulupa osho yo eengulufikola da kulupa.
Simeon okwa pula ovanangeshefa ile ovaleli vopapolitika opo va holoke momwaalu muhapu okuyambidida ofikola yavo.
“Ovanafikola vakulu va fikola pofikola Omaalala nava kufe ko oshihopaenenwa shiwa sha longwa kuAmupanda. Otashi ulike efano liwa ngeenge ovanafikola vakulu tava yambidida ofikola yetu,” ta ti.
Ofikola Omaalala oi na ovanafikola 500 ashike omwaalu otau ende wa uka pombada.