Charles Ndeumane
ONGWEDIVA – Omunandjungo papolitika Michael Amushelelo okwa tseyitha kutya keshi we oshilyo shongundu yopapolitika yoNEFF.
Omunapolitika Michael Amushelelo okwa tseyitha kepandja lye komalungula mOsoondaha kutya okwa hulitha po uukwashilyo we mongundu ndjoka a kala noku ndhana onkandangala oomvula ndatu lwaampoka. “Onomutima omudhigu tandi tseyitha ngeyi kutya onda etha po oshinakugwanithwa shandje mongundu yoNamibia Economic Freedom Fighters,” osho Amushelelo a shanga. Pethimbo lyoonkundathana noshifokundaneki shika Amushelelo okwa koleke kutya okwa thiga po ongundu yoNEFF ashike okwa ti omatompelo getokolo ndyoka ote kega gandja momasiku taga landula.
Momushangwatseyitho gwe, Amushelelo okwa ti ota ka tsikila niilonga ye yoku hwahwameka ngaashi shito. “Otandi ka tsikila noku gandja uuleli mboka wa pumbiwa unene moshilongo shetu,” Amushelelo a ti.