Oshilyo shongundu yoNamibia Economic Freedom Fighters (NEFF) Michael Amushelelo oshowo omuxwaxwameki gongundu yopapolitika Affirmative Repositioning (AR) Dimbulukeni Nauyoma oya mangululwa mondjeendhililo ongula yOmaandaha.
Amushelelo naDimbulukweni okwa li ya mangululwa sho ya li ya pewa eifutilomo lyoshimaliwa N$5 000 kehe gumwe, komupanguli omukuluntu gomompangulilo onene yopombanda Christie Liebenberg, sho kwa li ya mangwa po muMai nuumvo. Oshipotha shoka osha kala noku undulilwa komeho omolwomakonakono gaayeti yiihokolola yepangelo inaaga pwa.
Epangelo okwa li lya pewa ompito ndjoka ya hugunina opo lyi kale lya mana omakonakono ngoka kwa li lya ipyakidhila nago.
Amushelelo okwa kalelwa po kuhahende Nambili Mhata omanga Nauyoma a kalelwa po kuKadhila Amoomo. Shika okwa li sha etitha enyayanyu kaakwanezimo yaalumentu mboka yaali, mboka ya li ye ya hambelele nenyanyu pethimbo kwa li ya lombwelwa onkundana ndjoka ongula yOmaandaha.
Amushelelo okwa li a mangwa po tango sho kwa li i ikuthile oveta momake ge oomwedhi mbali dha piti, nokupopya kutya Aachiina naya pate oongeshefa dhawo netompelo kutya iinima mbyoka yAanamibia ya fikwa po oya faathana owala naambyoka tayi landithwa moositola dhAachina, komatungo taga ithanwa China Town moWindhoek.
Esiku lyomunyanyo gwa li gwa ningwa sha landula epato lyoositola dhaAchiina, omupresidente gwehangano lyo-NEFF Epafras Mukwiilongo oshowo omukulukadhi gwAmushelelo oyo kwa li yamwe yomwaamboka yaheyali ya mangwa nokwa li ya mangululwa esiku lya landula, sha ikwatelela komalandulathano noompango dha tulwa po.
Etokolo kwa li lya ningwa kuAmushelelo olya hwahwamekwa koshiningwanima sha ningwa kehangano Namibia Revenue Agency (Namra) ndyoka kwa li lya hanagula nokufika po iilandithomwa yAakwashigwana mbyoka ya kwatelwa koongamba dha yooloka.
Iinima mbyoka ya li ya hanagulwa po otaku hokololwa yongushu oomiliyona N$5.
Ta ti, Iilandithomwa oyindji yomuyo ya za koChina, ohayi landwa kaakwashigwana unene mboka kaaye na iilonga, taye ya okuyi landitha moshilongo, ashike Namra okwe yi kwata po netompelo ndyoka kutya oya ningwa nomadhina gomahangano gaantu, kaashi li paveta.
Amushelelo okwa tamanekelwa oshipotha shoku hwahwameka evundakano moshigwana, omatamaneko gane gokuya moositola dhAachina pwaana epitikilo dhooyene yoositola.
vkaapanda@nepc.com.na
Caption Oshilyo shongundu yoNamibia Economic Freedom Fighters (NEFF) Micheal Amushelelo oshowo omuxwaxwameki gongundu yoAffirmative Repositioning (AR) Dimbulukeni Nauyoma ya mangululwa.