ONGWEDIVA- Elelo lopamufyuululwakalo lOndonga ola ulika pambelewa Vilbard Panduleni Amutenya a ninge mwene womukunda Okantonge.
Amutenya okwa nangekwa Olomakaya ladja ko pefimbo loshiindingili sha li peumbo laye.
Ovanamukunda vaye okwa li va hafa okumona mwene womukunda mupe nove mu tambula ko pambelewa noiimbo yopamufyuululwakalo.
Omukunda Okantonge ou na omaumbo 47 nou li moshikandjohoolo Onayena moshitukulwa shaShikoto.
Amutenya odalele yomomukunda omo nokwa li a nangekwa pambelewa kelenga la kula loshikandjo Oniiwe Joseph Simaneka Asino.
Okwa pewa omukunda sha landula efyo laxe Vilbard Ingula Amutenya ou a kala mwene womukunda okudja omudo 2003 fiyo 2022.
Oshindingili okwa li kuna ovaleli vopamifyuululwakalo veendodo da yooloka, ovanamukunda vaye, novanhu va dja komikunda dayooloka.
Pefimbo ta nangekwa pambelewa Amutenya okwa ti popya ta ti okwa pandula kelelo laNdonga eshi lemwiinekelela oshinakuwanifa shokulela oshiwana nokuulikwa a ninge mwene womukunda.
Okwa kumaida ovakalimo vomomukunda waye opo va longele kumwe okuyambula po omukunda noshoyo okutota po eeporongalama dovanyasha momukunda.
“Kaleni muna ombili nelongelokumwe. Ovanyasha fimanekeni ovakulunhu aveshi veendodo da yooloka momidingonoko deni,” Amutenya ta ti.
Okwa popya yoo vali kombinga yefimano lehongo kovanyasha nounona kutya ovanhu na ve li honge nelitulemo opo vaka ninge ovanashilonga vomaifano a yooloka noshoyo ovaleli vokomongula.
Amutenya okwa weda po ta ti okwe li longekida okukala a yakula ovanamukunda vaye pauyuuki pehe na ou ta ningwa okatongo.