Omumati gwomimvo (32) Johannes Taukondjele a yambukile molukanda Onhimbu mOutapi, okwa patulile aapolisi oshipotha shedhengo nenyenyepeko lyolutu, sho ye mu dhengagula noku mu teya eembati, oshiwike sha zi ko.
Omulumentu ngoka ngashi ngeyi e li mosameende ye ihayi we manga kiilonga omolwa oshiponga sho a monithwa, okwa ti okwa dhengwa kaapolisi keena sho a ninga.
“Okwali ta tu ende tatu zi kiilonga komatango nomunilonga pamwe nangaye. Kuume kandje okwali a thikama mepandaanda limwe, a sitame,” Taukondjele ta hokolola. Ta ti, okwali a talela pegumbo limwe, mpoka mpwali omulukadhi a kuutumba. Omukulukadhi a nuwa okwa pula kutya omolwashike omulumentu ngoka ta talaleke a taalela kuye.
Ta ti kuume ke okwa gandja ombili, ashike omukiintu ngoka otwa tsikile okunyenyeta, sigo megumbo moka mwazi aamati yeya okulwitha kuume ke. Ta hokolola kutya okwali a hangukununa kuume ke naamati mboka.
“Nani pethimbo mpoka taya kolokosha omukulukadhi okwa dhenga ongodhi, a ithana opolisi. Opolisi ndjoka oya thikile ashike tayi tu dhenge nakuume kandje, inayi pula shoka shaningwa po. Ondi vite nayi oshoka aapolisi oya thikile ashike taye tu dhenge inaaya uva ehokololo koombinga adhihe. Shoka otashi ti nee ngiini?” Taukendjele ta tanguna.
“Gumwe okwa tula ndje kohi, ashike ondu mu tono oonkondo e ta ndi mu tula kohi. Mukwao okwa kutha ondopi e ta dhenge ndje moombati, nopompando, no nda kanitha oonkodo. Oya umbilendje mokambesa kawo, noya londe ke po kuume kandje, e ta ya hingi ya uka kositaasi yopolisi” ta gwedha po.
Ta ti ondjila ayihe, oya enda taya dhenge nokuthangagula kuume ke. Ta ti ye ina ye mu ninga sha we naanaa shaashi okwali e li monkalo ombinayi. Taukondjele ta ti, oyali ya pula okufalwa koshipangelo oshoka okwali ya ehamekwa unene, ihe aapolisi oya tindi, noye ya patele mondholongo moka ya patelwa. Ongula sho kashi, omupambele gwaTaukondjele gumwe okwe ya kondholongo a pule shoka sha ningwa po. Okwa pula wo kutya omolwashike aantu ya patelwa mondholongo yeli monkaalo yatya ngaaka.
“Sho ya mono ta kudhile ye ta pula a popye nomukuluntu gwositaasi, oye tu londeke mohauto, e taye tu fala koshipange. Oye tu thigi hoka, no itatu uva sha we kaapolisi,” Taukondjele ta hokolola.
Koshipangelo Taukondjele okwa monika kutya okwa teka oombati, nompando, nokwa tulwa mosamende.
Omukuluntu gwopolisi moshitopolwa shaMusati Titus Shikongo okwali a koleke oshiningwanima shika, ihe okwa ti, kaye na uyelele kutya gumwe okwa monithwa oshiponga.
“Sha ikolelela kehokololo ndapewa kaakonakoni yoshipotha, aalumentu mboka oyo yali ya dhenge aapolisi tango, nokuya iilonga yawo moshipala, omanga yeli miilonga,” Shikongo a popi ngaaka.
Ta ti opolisi nayo oya tulila mo aalumentu mbaka oshipotha, sho aniwa iilonga yopolisi moshipala.