Paulina Ndalikokule
Opolisi otayi kongo omunyasha goomvula 24 ngoka taku fekelwa oye e li omutse omunene mokutota po ehangano lyokulanditha oopolota dhiifundja ndyoka lya kengelela aantu ye vule o60 okuza mo2022.
MOsoondaha opolisi oya manga po aafekelwa yaali omulumentu goomimvo 23 ngoka oye li omukuntuwiliki gwehangano ndyoka osho wo omulumentu gwoomvula 25 ngoka a li kutwa ongomwiidhewuli mehangano ndyoka.
Opolisi otayi hokolola kutya aanyasha mbaka oya pondola okuyuga aantu ye vule po60, oshimaliwa sha thika poomiliona N$2, sho ya kala noku ya pula ya fute ko oN$50 000 mopolota nonande kape na uumbangi wopolota ndjoka. Omukengelelwa ngoka a futu ko oshimaliwa oshishona anuwa oye ngoka a gandja oN$40 000.
MoWalvis Bay onuwa omwa kengelelwa aantu o20, moWindhoek aantu o20, moTsumeb oye li 13 omanga mOngwediva mwa kengelelwa aantu 10.
Nonando inaku gandjwa omadhina gaafekelwa nenge edhina lyehangano lyawo, opolisi oya indile mboka ya kengelelwa ya ka patulule iipotha kiitaasi yopolisi i li popepi nayo. Oya indile oshigwana shi gandje uuyelele mboka tawu fala sigo opekwatepo lyomulumentu ngoka.
Opolisi otayi kumagitha wo aantu ya kale uupathi nokukwashilipaleka uushili womahangano omanga inaya gandja iimaliwa yawo, yo taya kwashilipaleke kutya oya mona omahala ngoka taga landwa manga inaya futa.
Komufalapevi Kauna Shikwambi gwopolisi yaNamibia okwa koleke oshinima shika.
-ndalikokulep@gmail.com