Aaniilonga yehangano lyokutunga tali ithanwa J&M mOndangwa otaya nyenyeta haya futwa oshimaliwa shi thike ashike N$600 komwedhi, nolundji oomwedhi mbali ohadhi vulu okupita po inaaya mona nando oyo othilinga.
Omuniilonga gumwe ngoka e shiwike koshifokundaneki shika, nedhina lye itaali tumbulwa omolwegameno okwa ti, okwa longele ehangano ndyoka oomvula ntano.
“Otatu mono iihuna, otwa kala twi indhindhimika, ihe itapu ya elunduluko. Aaniilonga yamwe ohaya thigi po iilonga, sho itaaya futwa, ihe aahona ohaya kongo ashike aaniilonga aape,’’ ta ti ngaaka.
Ta fatulula kutya, yo iilonga ihaye yi thigi po oshoka, uuna oshimaliwa shoka N$600 she ya, nonando okonima yoomwedhi mbali, ohaya ka landa ngaa omboloto, shi vulithe okukala megumbo.
Ashike gumwe gwomaakuluntu yehangano Monica Ndjembo ngoka anuwa oye ha futu aaniilonga ye ishewe omukukadhi gwa mwene gwehangano ndyoka okwa lombwele Kundana ta ti, shoka tashi popiwa kaaniilonga mboka kashi shi shoshili.
“Pamwe mboka taya popi ngaaka oiomboka haya longo ashike pamalupita, ihe kaye shi aanilonga yakalelela. Mboka haya kwathele oyo ashike haya longo uuna pe na iilonga ihe haaluhe,” ta popi ngaaka.
Ta ti, aaniilonga ohaya pewa iikutu yokwiigamena, shoka taya popi kasha na uukwashili.
Ashike omuniilonga gumwe natango ngoka anuwa a longo miilonga moka omimvo hamano okwa ti, oya kambadhala okunyenyeta omaupyakandhi gawo kaahona yawo, ihe ohaya yamukulwa ashike niitya iiwinayi.
“Petameko okwa li ye tu fatulilile kutya otatu ningi hatu longo ashike poondhopi, ihe nena ohatu longo iilonga ayihe. Otatu mono iihuna, otwa hala okupopilwa,’’ ta nyenyeta ngaaka.
Omuniilonga gumwe okwa ti, natango ehangano ndyoka inali simaneka uundjolowele wawo, oshoka kaye na iikutu yiilonga.
“Ohatu longo montsi, tayi zi momamanya, moondhopi, mevi nomoosamende, ihe katu na iikutu tayi opalele iilonga yetu oku tu gamena uuna tatu longo’’ ta ti ngaaka.
Ta gwedha po kutya, okwa li ya gandja omanyenyeto gawo kuuministeli wiilonga, mboka kwa li we ya nokuninga omapekapeko.
“Uuministeli okwa li wa londodha aahona yetu opo ye tu landele iikutu, oongaku oshowo omanyala gokulonga, ihe shoka kakwa li sha ningwa sigo onena,” ta popi ngaaka.
Omuniilonga omukwawo ha longo mehangano ndyoka okwa popi kutya,oya ndhindhilike kutya ohaya longithwa ngaaka oshoka oya talika ko kutya inaya longwa yo kaye na oonkondo dhokukutha onkatu ya landula ko.
“Oya itaala kutya ngoka uuvite ta monithwa iihuna, na thige po ashike iilonga, oshoka ohaya ka kuta ashike aaniilonga yalwe meendelelo,’’ ta ti ngaaka.
Mwene gwehangano ndyoka Kalambi Ndjembo kakwa li ta kutha po ongodhi ye yopeke opo a tye ko sha.- vkaapanda@nepc.com.na