OSHAKATI – Omumvu gumwe okwa nyenyeta kutya okwa shuna kegumbo inaa mona uuhaku okupendukila Etiyali sho anuwa a shuna kegumbo neho lya tsuwa sho a kala a tegelela ndohotola oowili ntano, ihe ina thika.

Aron Indombo ngoka a li a tsuwa meho koshiti, anuwa okwa li a yi koshipangelo shaShakati lwopotundi 01h00 a ka mone uuhaku oshoka ka li e wete ko sho a tsuwa.

“Onda li nda ningi oowili ntano nda tegelela ndohotola anuwa a minikile ndje ihe ka li a thiki po. Oshoka onda li tandi luluma nokwa li nda tila eho lyandje lyiyonukilile, onda li nda tokola okuya koshipangelo shopaumwene nonando kandi na okakalata kokupangwa,” ta hokolola ngaaka.

Indombo okwa nyenyeta kutya, otashi ehameke oshoka okwa longitha oshimaliwa oshindji oku ka pangwa koshipangelo shopaumwene omanga a li e na okupangwa moshipangelo shepangelo.

Ta popi kutya okwa kala nokukondjitha aapangi mboka ya li taya longo uusiku mboka ya dhengele ndohotola, ihe ka li ta kutha po.

“Aapangi oya kala taya kumagidha ndje anuwa nandi tegelele ashike ndohotola ote ya,” ta popi ngaaka.

Martin Pombili ngoka naye a li e li momukweyo a tegela ndohotola okwa ti okwa kala po oowili dha thika kune, ihe ina yakulwa.

“Moshipangelo muka oto sile mo, ohatu ya mo ashike twaa na nkene oshoka katu na iiyemo yoku ka futa kiipangelo yopaumwene,” Pombili ta nyenyeta ngaaka.

Ta gwedha po kutya nkene a kuthilwe ehokololo, okwa lombwelwa ashike a kuutumbe poshipundi anuwa a tegelele ndohotola.

Ta pula kutya ngele ndohotola ngoka ke po, kape na we ngoka ta vulu okukwathela?

Aamvu yamwe ya li momukweyo ya tegelela ndohotolola koongulasha ndhoka oya li ya shuna komagumbo sho ya loloka okutegelela ndohotola.

Omukuluntu gwoshipangelo shaShakati Ruben Kanime okwa ti, natango ina uva sha kombinga yoshiningwanima shoka natango. 

“Onda hala manga uuyelele waashoka sha holoka. Okokutya ashike oondohotola inadhi kolota moshipangelo shaShakati,’’ ta ti ngaaka.

Ta gwedha po ta ti, unene oondohotola dhokuyakula meendelelo inadhi kolota.

-vkaapanda@nepc.com.na