Taimi Haihambo 

Ongudu yopapolitika yoAffirmative Repositioning (AR), oya patulula oshitai shipe kOutapi moshitukulwa shaMusati omwedi wa dja ko. 

Omukulunhuwiliki wongudu mOutapi Petrus Shiweva okwa ti elelakano lokupatulula oshitai okuhanganifa nokueta ovayambididi vongudu pamwe. 

Shiweva okwa twikila kutya oshitukulwa oshi na ovanhu vahapu hava kala ve na omaupyakadi ndele kave shi nghee ve na oku a kandula po. 

“Oshitayi eshi otashi ka kala oupitilo wokuhanganifa ovanhu, opo va dule okupopya oumaudjuu nomashongo aa hava kala va taalela okudja koilyo ya yooloka yokomitiye, nonghee e na okukandulwa po. 

Oshitayi vati osha nangekwa noilyo yopombada i li itano yeendodo noinakuwanifa ya yooloka. 

Shiweva okwa ti, oshitai otashi kala hashi ongala keshe komwedi, opo va kundafane oikundwa i na sha nongudu, omaudjuu osho yo eemhumbwe dovanhu. 

“Ngaashi tu na omahoololo ookansela nomalelo eedoolopa tae uya ngaha, nafye mongudu yetu omu na okudja umwe ta ka kufa ombinga ongoshilyo sho-AR,” Shiweva ta ti. 

Okwa ti, ongudu natango oye lipyakidila okupatulula oitai keembinga da yooloka doshilongo osho yo okulilongekidila omahoololo wookansela domalelo eedoolopa a tengenekwa okukala ko neudo. 

-taimihaihambo2000@gmail.com