ǀAEǁGAMS – Kai!ādi !nâ hâ !hū!âdi hîa ai!gû ra ǂâiǂhansens ase ǂhanuba ības soab aib ge !Hūb di ǁÛba ge mî, mâsib mā-ams ose hâ ǂnaumâiǁanǁguigu dib nēsi ǀgaisase khoesiba ra tsâǀkhā ǁkhōǁkhōsasib ase īsa tsîb nē mâsiba ǂōǂōsib ase nî !gawaǀîhesa.
”Hâ a !gôakhâigu ge ǂkhîǂkhîsa tama hâ, ǁaupexan 900 000 Namibiaǁîna nēti ī ǂnaumâidi !nâ ǁan hâse. ǀNîsib ga nē !gôaba ǀnîkhami kō kaidisidi tamas ka io ǀoadisidi !gôab kha a oro, xawes ge nēsa noxopa sada kurisa ǁanǂgāsaben khoesiba ra tsâǀkhā,” tib ge Geingoba Kabinets ǁanina ǂoago wekheb Denstaxtsēs ai gere mîba.
ǀGûǁae ge a ǂoaxa ǀasa !gôakhâigu !oagu gu ge 308 ǂan!gâsa tama ǂnaumâiǁanǁguiga Namibiab !nâ hâ, ǁaupexa 228 000 ǂnaumâisa omdi hîa 995 000 khoena kai!ādi !nâ hâ!khaimâ hâse. Nē !huri!hurisa !gôab ge Shack Dwellers Federations Namibiab dis (SDFN) di !hū!nāsi !khōdana-aos Edith Mbangas xa ge māhe, ǁnāpas gere ǁgui!ā tsî mîse, 40 persentgu ǀgūse hâ Namibiaǁîn ǂnaumâidi !nâ ǁan hâsa kai!ādi !nâ, !gōsase ǀAegams ǂnamipe. Mbangas ge nē ǂanǂansa 2ǁÎ !Hū!hoas Konferensis tawa ge dī. ǁÎs ge ge mî, 2008ǁî kurib !nân ge 235 ǂan!gâsa tama ǂnaumâiǁan!khaiga 135 000 omdi ǀkha ūhâ isa 500 000 khoen hâ!khaise. Mbangas ge ge mî, kai!ā !hū!âde mās ra khoen di ǂhâsiga sī!nâsa dīhō tama isa, nēsin ga ǁîna a ǁnā !nās !naesabe tamas ka io sîsenôas ǀkha ǂgâxa xawe. !Hūǁîn ge ǁkhāsib !hū!â-e ǁama tsî om-e nî ombasens hâ tama tsîs ge nēsa ǀgapi maride ǀkhuwihâ!khaina mātares tsî ǂnaumâidi di ǀoasa ra !aroma. Nē !oa!oaxa mâsibab ge ǁnâutoas khao!gâb ge Geingoba, Kabinets tsî Kai!ā tsî !Garo!āisens Ministeri, Peya Mushelengab tsîna ǁgui-aisa ge mā, in !amǁare, Omkhâisens Xoaǁguib hîa Kai!ādi ǁga does tsî !Hū!āsoab ǂnamipe nî hâsa tsî nēs !nâ-ū !gomsina oresa hōba. Geingob ge !aruǀî ge mî, ǀkhuwiǂuis ase ra omhe omn ǁkhāti kaise ǀgapi ǁkhâkorobe ǂganǀgauga ūhâsa tsîs ǀkhuwis ǂnamipe ra hâ mâsiga kō!gâsa ores ase !hūǁîna a ība ǁkhāsa.