ONGWEDIVAS – Omusatib di ǀawa!namn ge auto!nari-aon tsî daoba ra sîsenū khoen hoan ai ǂgansa ge dī, ǂkhaigari hoaǁae daob ai hâs tsî daob saode ǁnâuǀnams tsîna, in nēs !nâ-ū daogu ai ra hâ auto tsūke!gân tsî khoena ûiga ǂoa!nâs !gôaba ǀoroǀoro. Omusati ǀKharib ǀawa!namn ǂhaitsi !oabadi mâisab, Inspekter Lineekela Shikongob ge ge mî, nē kharib ǀawa!namn kai !hausens tsî ǂâiǂhansens ǀkha ra !harasa daob sîsenū-aon tsî !nari-aon tsîn daob saodi tsî ǁgaraga ra !ûǂamsa. “Sida ge tsēkorobe ra mû mâtin daob sîsenū-aona ǁaetama is ǀgauba ūhâse daob ǁgaragu tsî saodi ǂnamipe ra tanisen ǀgausa. Dītsâdi autotsūke!gân !gôaga sada daogu ai ǀoroǀoros !aromas ge Namibiab ǀawa!namn hoa!nâ-aixase tsî !gōsase Omusatib nēti ra hâ ǁaegu, ǀhomaxasen autona daogu air a hâb !aroma !gōsase kai daogu B1 tsî B2 ai nî mûsa isa.” Nēti ī !âubasenhe tamase ra hā autotsūke!gâna ǁkhaubas !aromab ge Shikongoba !nari-aon tsî daoba ra sîsenū khoena gere ǂgan in !ûisen tsî hoaǁae ǂkhaigarise daogu ai hâ tsî naun xas tsîna ra ǂâise !nari tsî !haese ǁkhāubasenhe tamase ra ǂgâxa ǂōpamâsina ǁkhau ǁkhā. “Nēb ge ǂauna kai ǁaxasin ǀawas ǀkharib !nâ hâ ǁaeba tsî !gōsase sâǁaeb ǂauna !naridi nē ǀkhāb ǁga nî ǂoase ība, ǁnā-amaga i ge a ǂhâbasa Nampols, ǂhôamāǂui!khaidi tsî hoa !âǀhuru-aon nî sîsenǁareba māsa tsî ǀhûhâsiba ǁgau!nâsa māsa nēti ī ǂhâǂhâsa ǂande mā!kharus !aroma in !hūǁîna !norasase daogu ai tsâ tsî !norasase !nariban ra !ādi ai sī ǁkhā,” tib ge Shikongoba noxopa gere ǀkhomaǂgan. Ai!â gere ǂoa wekheb !nâ-i ge ǀgui kai autotsūke!gâ-i ǀgui-e nē ǀkharib !nâ ge !nurihe hâ i, 23 kurixa ǂkhamkhoe-i ge ûiba a ǂoa!nâse. Koro khoen nē tsuke!gâb !nâ ge hâ in, !nari-aob tsîna !khōǂgā hâsen ge Oshakatis ǂHanusi ǀaeǁgâub ǁga ge !khoe-ūhe ǁnāpan ge supu tsî ǁkhōǁkhōsa tsû-aina gere ǀae!khōhese. Nē tsūke!gâb ge Okahao-Oshakati daob ai ge hâ.