!Gaeǁnâxas, Tses, ǁKhūta!hoas tsî !Autsawises di ǁanǂgāsaben ge pirin, ǂnuwiǀuidi ra kuru-ūhe masindi, sementn tsî aniǂgarib sîsenūxūn hîa ǀhaob ai N$100 000 ǁkhāsiba !khōǂgā hâna, !Autsawises ǂgiǂgosi ǀawemā-aob, Jeremias Goeiemani di berosa xu ge !khō!oa.
ǀAwemā-aob gere mîs ge, mâs guisa i omkhâisen-e nî īs kara, xawen ge ǁnā ǀhûhâsib ǁanǂgāsabena ǁnāpa xu !oa!ū tamas ka i o ǂgan!gâsa ǀgaub !nâ nî domdore. ǁÎb ge noxopa a mîs ge, projek-i nî ǁkhaeǁnâhes kara, ob hoa ǀhûhâsiba nî !gâiaǂgao !khaisa, ǁîna !oa!ū nēsa !khō!oa tamas ka i xawes tsîna.
“ǁNā-amaga kaise a ǂhâbasa !khais ge. Hoa du ǀhûhâsib khoedu ase, mâǀhao, !khōǁôagu tsî nē projeks di ai!gûsa ǁawoǁawo tsî ǀguipa omkhâisensa ǀhûhâsigu !nâ !aromasa,”tib ge Goeiemana nē ǀkhaeba xu ge domdore khoena gere mîba. ǁKhātib, ǁîna gere ǀawemās ge, in ǀgui !nans ase sîsenǀhao tsî !uru ǂâibasens omkhâisens ai hâsa sī!nâ.
“ǁKhāti ta ge sado gangansa nî mā, ǂnû tsî du ǂgaeǂgui ra ǂhanuba xu sîsenosib mâsib, hîa ǀgaisase !Autsawises ǂgiǂgosi ǁhûi!nâǂharis !nâ danasa ra ǀhōǂuiba oresa hōbahesa !âuǂnû tama hâ, xawe aitsama ra ôa-amsa mâti du nēs !nâ-ū nî !kharusa,”tib ge ge mî.
Nē !kharaga huiba xu ge domdore ǁanǂgāsabenab ge gere ǂgaoǂgao!nâ, in nē huiba !khō!oas khao!gâ, ǂhâbasa ǀguixasib tsî !garise sîsens ǀkha !khai-i ai sī-ū tsî omkhâisensa īǁkhāsib !nâ ǂgā. ǀAwemā-aob ge noxopa a ǀgonǀgon!gaos ge, mâ !nani ǁkhâgu hoagu !nâs beros ǁîb disa saride dī tsî nî kōsa, hoan noxopa !gâise ra ai!gû tsîn huisenūxūna noxopa sîsenūhe ǁkhā mâsib !nâ hâsa, ǁîn nēsi go domdorena xus !âubasensa hâ, ǁkhawan projekdi ân ra ǀomkhâi tsî khoraǂuisen khami ǀhûhâsigu ǁga nî mā-oasa amaga.
ǀNî ǁgûs hîa nēpa xu ge domdores, Diana Matheys (52), Woeker en Bou Bricklaying Projeksa Tsēs !nâ ra ǂnûǁkhaebas, ge ge mî, ǁîn ǀnai ǂnuwiǀuide ra kurusa tsîn nē go hāǀaro 100 ǁhōdi sement-i ǀkha noxopa nî ai!gûsa.
“Sida ge kaise nē huiba ra !gôa!gâ tsî nî dītsâ nē projeks nî ǂapaǂoa tsî da noxopa ǀnî sîseno khoena nî sîsenmā ǁkhāsa,”tis ge ge ǀaro. 53 Kurixa, Paul Kahuikab, !Gaeǁnâxas Omkhâisens ǀHûs dib, ge ge mî, ǁîn ge 26 piridi tsî ǁgōba ǁîn projeks !aroma a !khō!oasa. “Huib ge ǂhanu ǁaeb ai go hā tsî da ge sida nî ôa-am, !gôaga ǂhākhâi tsî hā nî ǁaeb !nâ ǀnî ûitsamaxūna, ǀhûhâsib !nâ hâ ǂkhawusa khoena ǂkhâ!nâ !aroma nî ǀgoraǂuisa,” tib ge gere ǀgonǀgon!gao.