Onesmus Embula
ǀAEǁGAMS – Namibiab ǀAwa!namn Dana Inspekters Kaunapawa Shikwambis, ge ge mî, ǁîn ra ǁnāti i ǁhōn hîa !narisarima-aon !oagu ra dīhena aimâisa in nēti ī !narisarima-aona mā-amhe ǁnâu!gâ!khaib ai!â ǂhaisa ǁîn !kharaga !hūgu ǁgan nî ǁarus ai!â. Shikwambis ge nēsa ra mî, ǁnāpas ǁnaetisasen ra !narisarima-aon hîa ǂkhawadīb ǁaxasin, aiǁgause ǂgui !gôab ǁkhāsiba ūhâ marina ǀhanahes khami in !nâ-ū ra !kharuna, !nuri!gâs ǁhōna kuru ǂgao tama hâsa ǁîn ra mî amaga, ǁîn sâǁaeb ǁaxasinan ǁnā ǁkhoao mâsin ǀkha !khom!nâ ǂgao tama hâsa, ǁnâu!gâ!khaib ais ai si mû!kho-amaose mâs ǀkha. Nausa di ge ǀnî !nae!khaide ra hâ, !narisarima-aon !nuri!gâs ǁhōna ǀawa!nam tawa ǁkhowa-am ǂgao tama hâsa, kaise gaxuse ǁnâu!gâsa ra ū tin ra mî amaga, xawen ge nausa !nāsana ǂkhwadīb tsî !narib mâsiga ra !nuri!gâ. Shikwambis ge ǀgūae ge Erongo ǀkharib !nâ !Gomenǁgams tawa hâ i autosa khôaǂgâ tsî !naris dib, CR54/10/2018 ǁhōb ǁga ǁnaeǁgau tsî ge mî, nē !nae!khais ge 13 ǂNūǁnâiseb 2018dis ai a isa, ǁnāpa-i ge ǂâisāhe ra-e Suid Afrikab !narisarima-aon autosa khôaǂgâ!nâ tsî maris tsî N$24 800 ǁkhāsiba ū xūn tsîna a !nariǂuisa. “Haka khoegu ge ge !khōhe tsî 15 ǂNūǁnâiseb 2018 dis ai ǁnâu!gâ!khaib ai!â ge ǂhai,” tis ge Shikwambisa ge mî. !Narisarima-aon nē !nuri!gâsa ge dīn tsîn ge ǁnâu!gâ1khaib ai!â ǂhai tsî ǁîn ǀkhāba ge mā tsîb ge ǁhōba ǁnāpa xu ge mâiǂuihe, ǀawa!namn !aruǀî hâ ôa!nâde !ēsa mās !aroma. ǀNî !nae!khais hîa ge ǂoago wekheb Denstaxtsēs ai Tsaraxa-aibes di Puma !Khauǁuib ǁAi!khaib tawa a hâs ǁgas tsînas ge Shikwambisa gere ǁnaeǁgau. ǁNāpa-i ge ǀūsa khoe-e !uri Ford Ranger autob hîa Swiss tarekhoes ge !nari hâ ib !nâ khôaǂgâ tsî apaǁgarub N$36 000 ǁkhāsiba ūhâ xūn diba ge !nariǂui. Nēsis kōse-i ge ǀhapixa khoe-e !khōsis !nâ ūhe tama hâ. Namcols ge hoaǁae !narisarima-aona ǀawemā tsî ra mî, în tā ǀgau-i ais tsîna ǁgauǂui ǁîn a !narisarima-aosa tsî ǂgōsen ǂauna marin ǀkha ǁîn ǀkhādi ai hâmasa. An hoaǁae ǂkhaigari hâ tsî ǁkhamasase ra tsâ kai ni khoen ga ǁîn ǂnamipe hâ o,!norasasib !gôade ǁkhami tamas ka io ǀnî khoe-e ǂanǂan.