Aron Mushaukwa
Katima Mulilo
Babato eza bamashumi amane kababalalu (43) – basali babalishumi kababalalu (13) ni baana bamashumi amalalu (30) ili babazwa mwa naha Zambia, bane bakeni mwa naha isi kamulao, nebatamilwe mwa Katima Mulilo Labutanu viki yefelile. Kuitekezwi kuli nebabonahalile mwa khuta Lamubulo.
Banyaziwa kakukena mwa naha Namibia basina mampampili abalumelela kueza cwalo. Babañwi bakubona banyaziwa kakulekisa libyana basina mampampili abalumelela kueza cwalo kuzwelela kwa muuso.
Nebatamilwe mwatolopo, ili kanako yamungendenge wa mapokola ozwelapili mwa sikiliti. Libyana zeñwi zene kenyizwe mwa Namibia isi kamulao zenengilwe ki mapokola kuna ni bupi bwa bonyi, kwai, mapilusi ni lino.
“Libyana ze lilekiswa kwa bayahi banaha Namibia, mi bayahi banaha Namibia batabela kulileka kakuli licipile. Kacwalo, nelubata kukupa bayahi banaha yaluna – kikwabutokwa kuli muyoleka mwa lintolo zeñolisizwe, iliko lika lilekiswa kamulao mi nelitatubilwe kibaba bona zalibyana zezwa nikukena mwa naha,” nekuelelize Yomuhulu wa Sipokola mwa sikiliti sa Zambezi Karel Theron.
Theron nazwezi pili kukupa bayahi basikiliti sa Zambezi kutokolomoha kunoleka libyana zeo kakuli likona kutisa kozi. “Libya ze halisika tatubiwa kibatatubi baluna balibyana. Kwakona kuba nimabeela mwateñi, hakuna yaziba,” nafile mamela.
Attached Photo: Bane bakeni isi kamulao babazwa mwa Zambia bane batamilwe mwa Katima Mulilo viki yefelile