LIPONISO za Njimo ni Bumapangapanga za mwa mulenen`I wa Windhoek neli kilwe za taluswa kuli neli zamaile hande kakuli neli boni bapoti ba palo ye fitelela 90 000 mwa mazazi a loban`wi (9) zene li kilwe za swaliwa, inge ba fita fa minyako.
Mubakweli ku Mueteleli wa katengo ka liponiso, mutompehi Schimidt na kile a taluseza ba mutende o kuli, lipiho kuzwelela kwa ba bonisi neli zende luli.
Na ekelize kubulela kuli lipiho ka kubona kamaniti neli zende luli, kakuli ha talima fa palo ya ba bonisi bese ba nyatezi kuli ba kone kubonisa ni kusupeza bukwala hape mwa silimo se sitaha, palo ya bonahala luli.
Palo yaba bonisi ye likana 50 kakuya ka Schmidt ne kile ya kupa kuli I konwe kutalimwa kuli I kone kusupeza hape kwa liponiso za silimo se sitaha muta liponiso li kwalula minyako hape.
Palo ye yaba 50 kakuya ka Schmidt, ne kilwe ya ngiwa muta liponiso li kwala minyako.
“Liponiso ze, neli zen`wi zene konile kuzamaya hande. Palo ye likana 90 057 ya bapoti ne kile ya taha kwa liponiso. Lutalimezi feela kutateka ni buitukiso bwa silimo se sitaha,” ne ku bulezi Schmidt.
Nihaike minyako ne kile ya kwaluha kweli ya Muimunene hane ina ni mazazi a mashumi a mabeli ka a lobapeli (28), ni ku kwala kweli ye hane ina ni mazazi a manee, batu bene ba kile ba potela sibaka sa liponiso mwa lizazi la pili la kakulo neli ba sikai.
Ze ni halilicwana, bun`ata bwa ba bonisi neba kile ba biha kuli sicaba nesi kile saba potela ahulu mwa lizazi la bubeli ili lizazi lene li bile la pelekelo ili lizazi hape lene li konile kubiha pisinisi yende.
Ba bonisi ba banyinyani neba kile ba lumbaka katengo ka liponiso kuli neka konile kubupa silalanda sa kuikabela maikuto ni zibo.
“Liponiso ze, ki silalanda saka sa kufumana likelezo za kuhulisa pisinisi yaka,” ne kubulezi Walton Ndomingo yana zwelela mwa tolopo ya Grootfontein.
Nihaike bun`ata bwa ba bonisi neba kile ba tumusa tabo ya bona kuamana ni liponiso, ba ban`wi kakuya ku mubakweli ku Mueteleli wa katengo, neba kile ba bilaela kuli bona neba sika potelwa, nto yeo yena Schmidt na kile a bulela kuli ne konilwe kutiswa ki ku saba ni zibo ya litekiso ili zibo yene kona kubiza batu mwa libaka za bona, nto yeo a bona kuli kamaniti ki yene tisize likayaman kubona.
Schmidt na konile kubulela kuli, ba bonisi bene ba simuluha naha South Africa neba konile kusupeza bukwala kakuli neku bonahezi kuli ne bana ni zibo ya litekisano ni musika sina libaka za bona hane lipotelwa ki sicaba luli.
Mubakweli ku Mueteleli wa katengo na kile a bulela kuli liponiso li swanelwa kuno ngiwanga ka tokomelo ahulu kakuli ki sibaka seo ba bonisi ba swanela kusupeza bukwala ili kuli mane liponiso li mano feela sicaba sisa kona kuleka hape kapa kukupa kelezo.
Ne ku sika ba ni lisitataliso ze tuna silimo se, kakuya ka Schmidt.
Lizazi la mafelelezo kakuya ka Schmidt neli kile la bona palo ye pahami hanyinyani ya busholi kakuli maselufoni a lishumi ka a lobapeli (18) na kilwe a bihiwa kuli na kile a uzwiwa kubeya tumabegi totu nyinyani. Busholi bobu swana nebu tisize kuli mane ba katengo ka liponiso ba kone kukwala liponiso ka nako ya bubebe isi nako yeo liponiso neli kwala ka yona.