KATIMA MULILO – Kulatelela kubonahala mwa khuta kwa baetapili basilezi bakatengo kasikiliti sa Zambezi, babanyazwa mwalikakalezo zabulyangelino bwa masheleñi alikana bolule babane kalikiti zenyanda isupile (N$4.7 million), sicaba sesi bilaela sa Kongola nesi cauzi, balaela kuli babakulubelwa bane balukuluzwi kulibelela muzeko wabona kwande, bakutiswe mwasitokisi kapilipili kufitela muzeko wabona ufela.
Masheleñi akulubelwa kuli na tondahalile kwa katengo kasikiliti, naswanela kuzwisezapata mapurojekiti kwa maino a Kongola kakutahisa mezi, mulilo wamagesi, lisebelezo za limbuzi ni zeñwi cwalo. Buñata bwa bayahi kutisa cwale basanwa mezi amasila azwa mwaliliba zakuikabela ni limunanu zabona, ni lifolofolo zanaheñi zetaha mwa minzi yabona kuzwelela mwasibaka sa pabalelo yalifolofolo sa Bwabwata.
Labulalu khuta ya Katima Mulilo neisize taba la 9 Muimunene. Sicaba sesi bilaela nesi cauzi fapila khuta lizazi leli swana pili babanyazwa basika bonhala kale mwa khuta. “Taba yeo kilubaka lolutuna kwa sifateho sa katulo ni kwa sicaba sa Kongola, hakutalimwa butuna bwa taba. Luna, sicaba sa Kongola, luikutwa kuli taba ye iswana nitaba ya Fishrot mi sikwata siswanela kubeiwa fasikala sesi swana,” nekubulezi Linus Naha kuyemela sicaba. Taba yezibahala hahulu ya bulyangelino ya Fishrot iama makwambuyu ni baana balipisinisi babanyaziwa kabulyangelino bwakuca masheleñi alikana bolule bamyanda yemilalu.
Sikwata sibulela kuli siswabiswa kibazekisi bamuuso kakuli batu babañwi bafiwa “likatulo zaluswana lwa gauda,” mi babañwi bafiwa likatulo zebukiti basa lumelelwi kuiketela kulifa masheleñi. “Muñaka, masheleñi alikana $4.7 million asebelisizwe kabulyangelino naswanela kupulusa sicaba sa Kongola. Batu ba Kongola ba mwabutata zazi ni zazi bakeñisa buhule bwa lisebelezo zecwale ka sipatela sesituna, lififi mwamikwakwa mi batu banze bacaiswa kilimotikala sina haba ikabela mukwakwa oswana,” nekubulezi Naha mwaliñolo la lipilaelo. Sikwata nesi tambekile liñolo la lipilaelo kumuetapili wabazekisi Brohan Mukowa yana sepisize kulilumela kwaliofesi zeswanela.
Basilezi babanyaziwa ki Regina Ndopu-Lubinda, ili muzamaisi wakatengo kasikiliti kuzwa silimo sa 2011; Beaven Walubita, ili muetapili wakulela ni zwelopili mwalibaka zamatakanyani; mubakweli wakulela Cletius Mubita; muleli yomuhulu Daniel Mbala; mubakweli muetapili wakamaiso Abraham Shikoyeni; hamohocwalo ni muzamaisi mwaofesi ya masheleñi Nimrod Lichela. Neba bonahalile kalikakalezo zakusebelisa litulo zabona kuitabisa kabuitati. Kaufela babakulubelwa nebalifile masheleñi alikana N$50 000 akulibelela muzeko kwande, mi nebakutezi kwamusebezi mwakweli ya Yenda kasamulaho aponahalo yabona yapili teñi neba tomezwi masheleñia ao.