ONGWEDIVA –  Babihi ba makande ba ba bihanga mikopano ya Mubakweli Mueteleli wanaha Netumbo Nandi-Ndaitwah babilaela kuli batukufazangwa ki malonda bahae. Babilaela kuli kamita ha babata kushimba maswaniso amuipapati mueteleli wakopano ya Swapo malonda bahae hababa ezingi hande. Babihi ba makande neba hatelezi kuli zeo liezahala feela kwa mikopano kokuna ni mubakweli wanaha, mi malonda bahae habana sizwale.

Kezahalo ya kukwalula siteshini sa mapokola sa Onawa viki yefelile nesiile babihi bamakande banyemile. “Halusanga maswaniso lulukuluhile. Baswanela kukuteka liswanelo zaluna ni musebezi waluna,” nekubulezi mubihi wamakande. Mubihi yomuñwi naize fokuñwi ba bulelelwanga ki malonda kuli bazwe bukaufi ni mubakweli mueteleli wanaha. “Munahanisise, mufa musebezi munze munga maswaniso a Mubakweli Mueteleli, kono mapokola basipokola sesi ketahani bataha nikuto kukwalela. Fokuñwi bayema fapila makamera,” nekubulezi mubihi yomuñwi.

Babihi ba makande neba hatelezi kuli musebezi wabona kikulemusa sicaba. “Lubata kunga maswaniso sakata kusina kuhaniswa,” nekubulezi mubihi yoñwi. Babihi bamakande neba bulezi kasepiso yakusatungululwa kasabo ya kunyaziwa. Hana kupilwe kubulela fataba yeo Nandi-Ndaitwah naize uka ikopanya ni mulauli wasisole sa naha Joseph Shikongo kuli taba ya sipokola sesi ketahani yatalimwa. “Babihi ba makande baswanela kueza musebezi wabona kusina kusitataliswa. Kaufela luna lueza musebezi waluna,” nahatelezi.

Nandi-Ndaitwah naekelize kuli kamita uikola silikani sesinde ni babihi ba makande. Kiha lakaleza ba bihi ba makande litohonolo ni makete amande mwa musebezi wabona wakuzibisa sicaba. Hana kupilwe kubulela sesiñwi, Shikongo naize babihi ba makande baswanela kuzibisa sicaba kacwalo musebezi wabona uswanela kungiwa kuba wabutokwa. Naize halumelelani ni taba ya kukasha ba bibihi ba makande kisipokola sesi ketahani.

“Babihi ba makande bana ni silikani sesinde ni mapokola. Batusanga mapokola kuhasanya mañusa,” nabulezi. Nakupile makampani abiha makande kubona kuli bafa babihi ba makande macansi abuizibahazo kuli bazibahale hande. “Kikwabutokwa kuli babihi bamakande bashimba makadi abuizibahazo kakuba babihi ba makande linako kaufela, kakuli mutu ufi kamba ufi ukona kuba mubihi wamakande wabuhata,” nabulezi.

Mulauli wasipokola nakupile sipokola sesi ketahani ni babihi ba makande kufana likute kufita kukashana. Kono Shikongo naize fokuñwi babihi ba makande bayema mokuhanisizwe. “Malonda baeza feela musebezi wabona. Musebezi wabona kikubona kuli Mubakweli Mueteleli usilelelizwe,” naekelize.