KATIMA MULILO – Baketalizoho hala balishumi ka alimuñwi bane bakile batamiwa kamulatu wakunata ticele wamuuna yana ni lilimo zemashumi aketalizo kazelobapeli (58), mwa komano ya kulwanela mubu, neba bonahalile mwa Khuta yenyinyani ya Katima Mulilo Labubeli, fapila muatuli mwa khuta yenyinyani Laina Namboga. 

Muatuli naba lumelezi kulibelela taba yabona kwande kakubatomela kulifa N$2 000 muñwi ni muñwi. Zeo kaufela nelitahile kasamulaho akezo yene ezahezi Lasunda teñi muuna wa lilimo ze 58, ki mubilaeli hape wanyaziwa. 

Piho ya mapokola ibulela kuli muuna wa lilimo ze 58 nakile asupa Simon Ikosa walilimo zemashumi amalalu kazelobañwi (39) tobolo kwa masimu mwa silalanda sa Kanono, mi nakile afumbela kuli uka mukunupa haiba inge amata. 

Kasamulaho ahola. Ikosa nakile abihiwa kuli nailo kuta ni babañwi balishumi nikuto lindaula muuna walilimo ze 58. Teñi neba mulobile mutahali, kumusikula liino, kumululuhisa liito la nzohoto, munwana omunyinyani wakwa lizoho la nzohoto, ni sifuba, ni kumu utwisa butuku mwa toho ni mukokoto. 

Kasamulaho alipatisiso zamapokola basilezi hala balishumi ka alimuñwi nebakile balukuluwa bakeñisa kutokwa hande bupaki. Baketalizoho Shylock Muituti, Machaba Ikosa, Samuel Kepa, Victor Mubusisi ni Simon Ikosa, nebakile babulela kuli habana kuitumelela mulatu, mi nebaize baka ipatela bayemeli bakwa mukunda. 

Muuna wa lilimo ze 58 nasa lobalizwe mwasipatela sa Katima Mulilo akantelwa ki mapokola mi nabihilwe kuli nali mwa mayemo ambubo. Taba ne isizwe la 11 Liatamanyi kulumelela lipatisiso za sipokola kuli lizwele pili.