WINDOKO – Kutokwa buiswalo kwababeleki mwaofesi yebona zakufa mañolo abukwaezi ili yezibahala hahulu ka Natis, ili babalekisa mañolo abukwaezi mwalinzila zefosahezi kwabakwaezi babasina lyano famukwakwa sihulu bakwaezi babansu, hala zeñwi kutisa kekezo yalikozi zafamukwakwa mwanaha Namibia, limembala ba Swapo mwandu yamilao nebabulezi Labulalu. Natis kona katengo kakafa mañolo abukwaezi kwabatu mwakamaiso yakatengo kakabona zamikwakwa, kona ka Roads Authority (RA). Likwambuyu yabona zakulikanelela kwabaana ni basali, nipabalelo yabanana Doreen Sioka, nanyazize babeleki ba Natis babasina buiswalo, ili babalekisa mañolo abukwaezi kwabatu babasazibi kukwaeza, kakuba hala zeñwi zetisa kupahama kwalikozi zafamukwakwa mwanaha.
Sioka hana bulela fangambolo mwandu yamilao Labulalu hala litaba zetisa hahulu likozi zafamukwakwa mwanaha naize: “Butata buinzi kwababeleki ba Natis babalekisa mañolo abukwaezi kubao babapalezwi. Kuna nimutu yomuñwi koo (kwa Natis) yaeza masheleñi fataba yeo, Natis iswanela kulukisa ndu yayona.” Mwahala kweli ya Sope ni Ñulule 2018, nekubihilwe likozi zafamukwakwa ze 3385 mi batu ba 492 nebatimezi mi ba 5431 nebaholofezi, mapokola neba bihile. Hana bulezi hala ngambolo, Mubakweli kulikwambuyu watutengo twasicaba Veikko Nekundi naize, “batu balitalo laka”, (ili kutoloka batu babansu), batisa hahulu likozi zafamukwakwa, bakeñisa mikwa yabona habali famukwakwa. “Butata kikuli batu balitalo laka, luna ni mikwa yemaswe. Haluya kwamikopano, kungelela ni mukiti walizazi latukuluho one uezahezi cwanuñu, nemuswanela kubona mone bayemiseza limotikala zabona kwamaheta amukwakwa,” nabulezi.
Naize nto yeñwi iswanela kuezwa hala bakwaezi babana nimikwa yefosahezi. “Taba ye kiya butokwa, mi itokwa maikuto amatuna kwatutengo totu lukela,” nabulezi. Hana alabela niyena kwangambolo Likwambuyu yabona zasilelezo ni buiketo Charles Namoloh, nahanile maikuto akuli kumatisa hahulu kona kokutisa likozi zafamukwakwa mwanaha. “Butata buyemi famikwa yabakwaezi, hamuya kwa Germany kuna nimukwa mo bakwaezi balumelezwi kumatisa lubilo lobatokwa kaufela, mi kumatisa hahulu hakukoni kuba butata nako kaufela,” nabulezi. “Haiba mwatokomela bakwaezi balimota zelonga batu, bakalisa pili kakubona zakulonga batu. Kona mobaitutela kukwaeza. Kazibo yelikani, banga lumonyi kubabahulu babona nikukala kumatisa, taba yeo yabilaeza,” nekubulezi Rainhold Nauyoma wakopano ya APP.