Marythar Kambinda
KATIMA MULILO – Likolo la Mabasi, Miseto, Buiketo ni Silelezo nelifelize mungendenge wakufa makadi abuizibahazo amanca mwasikiliti sa Zambezi viki yefelile. Kufa makadi amanca nekutahile kasamulaho atumelelano ya Mubusi wanaha Hage Geingob ni mubusi wanaha Botswana Mokgweetsi Masisi la 23 Yowa 2023, kulumelela bayahi balinaha zepeli kunga musipili kakusebelisa makadi abuizibahazo amanca. Mungendenge one ukalile la 13 Liatamanyi kwa Nakabolelwa nobile teñi mwalibaka za Ngoma, Ioma, Mutikitila nikutofela kwa Ibbu la 17 Liatamanyi, no lumbilwe kiyabona zakamaiso mwa likolo mwa sikiliti Re-Loux Tapelo.
Tapelo naize mungendenge nondongwami babapila kwamukulela wanuka ya Chobe, kuba konisa kunga misipili kakusebelisa makadi amanca. Sicaba nesi itumezi kwamubuso kwakalulo yeo yene boni batu babalikana sikiti kutaha kwaliñolisa. Kono nabulezi hala butata bone bubile teñi sina batu babasapili kwamukulela bane bataha kwakuiñolisa. “Kono nelusa kutisi batu, nelu amuhela batu kaufela,” nabulezi. Induna wa Ibbu Kenneth Munihango naitumezi kwasikwata sa likolo sene silumilwe kuyo tusa sicaba. “Luna ni mabasi mwanaha Botswana, fa selukona kuyo bapotela kusina butata kwakufumana litupa, Ili zetula. Kono fa lutusizwe kufumana ma kadi abuizibahazo mahala,” nabulezi.
Isabell Kwenani ili ticele kwa Ibbu, naize nekuli tata kufumana situpa. “Fa selukona kupotela bahabo luna mwanaha Botswana kamita kusina kubilaela kuli situpa sika tala,” nabulezi. Naekelize kuli kwanda musipili omutelele mibamba yakuyo yema kunga situpa neli yemitelele. “Mubuso ulutiselieze lisebelezo zeo fakaufi, hanisika lyeha mwamubamba,” nabulezi. Ticele yomuñwi kwa Ibbu Joseph Simasiku naize muuuso no utwile sililo sa sicaba. “Nitabile hahulu kakuli hakuna masheleñi alifilwe. Neli mahala mi hakuna yanana ni kunga musipili kuya kwa tolopo,” nabulezi