Mapokola baketalizoho ni mubabaleli walifolofolo neba isizwe kwasipatela kasamulaho akulengiwa kipula, kwakambe yabona mwasibaka sapabalelo yalifolofolo sa Bwabwata. Pula hape nebulaile muuna kwamunzi waNgaraunda mwasilalanda sa Ndiyona. Mapokola nebaize Lamubulo kanako ya 15h00 kwasimu ya Ngaraunda mwasilalanda sa Ndiyona, mwasikiliti sa Kavango ya Upa, muuna walilimo zemashumi amabeli kasiliñwi nashwile kasamulaho akulengiwa kipula, hane ali mwasitungu ni muhulwanahae ni mwana hae.
Muhulwanahe ni mwanahae neba bandukile, nihaike situngu nesi yakezi mulilo. Nyandi nazibahalizwe kuba Maundu Muhoko. Mwakezahalo yeswana mwasilalanda sa Mukwe mwa Bwabwata, limembala zelwanisa kuzuma isi kamulao neba matiselizwe kwasipatela sa Andara Labubeli kasamulaho akupunyuha, kulatelela kambe yabona hailengwa kipula, hamoho cwalo ni mubeleki wakwasibaka sapabalelo yalifolofolo. Nebalengilwe kanako ya 16h00 kwakambe ya Bolicia. “Limembala nebali mwamatente abona inge balobezi kakuli pula nesweli kunela, habanatwa kilumonyi. Nebasika holofala kono nebali mwasabo. Bamwamayemo sakata mi nebafumani likalafo.”