Omupresidente wongudu yoBody of Christ (BCP) Festus Thomas okwa indila ovakriste aveshe nOvanamibia koonono opo va hoolole ongudu oyo vati tai ka eta epangelo popepi noshiwana notai ka kandula po omikundu odo da taalelwa koshiwana. 

Edi okwe di popya poshiongi shongudu yaye sha li kOmuthiya moshitukulwa shaShikoto mEtitatu. 

Thomas okwa ti epangelo li li koshipundi inali wanifa po eemhumbwe dovakwashiwana moule weedula 34 da ka pita. Omupresidente wo-BCP okwa faafanifa Ovanamibia nehokololo loshiwana shOvaisrael mombiibeli, ta ti ngeenge okwa hoololwa a ye koshipundi, otaka ya meenghaku daMoses nota ka “twala oshiwana shaye kedu leudaneko”. Ta ti eshi ote shi ningi mokulundulula omayakulo, eyandjo loilonga neyambulepo loikondo youhaku. “Paife efimbo lokuhoolola omuleli e na oshiwana komutima, omuleli e na ohokwe yokukandulapo oulingilingi tau ningwa moshilongo osho yo okuhe na oushili peendodo da yooloka depangelo. Omuleli ta amene ovakwashiwana vaye, ta xumifa emona loshilongo pombada nokuyambula po oufemba nemanguluko lovakwashiwana,”  Thomas ta ti.

Thomas okwa twikila ta ti okuhoolola BCP okuya komutumba wopashiwana, vati oto hoolola oshili, osho yo ovaleli tava ka yandja omayakulo oshiwana kombilixa. Thomas okwa holola oinima tai limbilike oshiwana ngaashi oulingilingi, elongifo nai lomaliko epangelo, osho yo ehelixwepo mokutukula omaliko oshilongo. Thomas okwa indila Ovanamibia aveshe opo va kwashilipaleke kutya ouwa woshilongo ongeenge BCP e na omawi momutumba wopashiwana. “Ongudu otai lalakanene evadimo laKalunga tete komesho yoinima imwe osho yo okutula eemhumbwe dovakwashiwana komesho. Otwe lilongekida okukandula po omaupyakadi, tuhe na oumbada ile oukombuda nondi li apa opo ndi mu kwafele mu hange omalalakano eni amushe,  Thomas ta ti. -wakudumoauleria@gmail.com