Charles Ndeumane
ONGWEDIVA – Aahwahwameki yo-BIG Coalition onkene t ya pula komeho nokwiithana epangelo lyi tameke okupa kehe Omunamibia oshimaliwa shokomwedhi shi thike po N$500 nenge shi vule po.
Ehwata lyomahangano ndika olya hala epangelo lyi tule edhiladhilo ndika miilonga mbala ngaashi tashi vulika oshoka anuwa onkalo yoluhepo moshilongo oyu uka kuuwinayi.
Ehangano ndika olyuunganeka olweendo lwokuholola omadhiladhilo, momasiku 15 Juni 2024 mOvenduka.
Omuhwahwameki gwuuthemba nonkalonawa yopantu Claudius Riruako okwa thamuna kutya iimaliwa mboka taya pula epangelo lyi pe aantu komwedhi otayi zi miifuta mbyoka hayi nanwa aaniilonga, yo natango oyi na ashike okushuna moshiketha shepangelo sho aantu taya landa iinima yawo.
“Omayambidhidho gopashimaliwa ngoka tatu pula epangelo lyi gandje kaantu otaga ka lundulula oonkalamwenyo, otaga ka yambula po aantu,” Riruako ta ti.
“Aakwanepangelo naanapolitika oya hala tu ya hogolele ye tu longela shike?
Ngele tatu pula ya ningile oshigwana uuwanawa oya mwena, ashike ngele she ya pomahogololo otaye tu uvanekele iinima oyindji.
Inatu hala omauvaneko, otwa hala ashike epangelo lyi shi tule miilonga,” osho Nafimane, gumwe gwomaahwahwameki ya kwaleta komeho oshinima shika a popi ngaaka.
Aahwahwameki oya ti oye shi kutya epangelo ohali gandja iikulya, ashike oompumbwe dhaantu moshilongo kadhi shi ashike iikulya, ashike aantu oye na oompumbwe odhindji t dhi vulu ashike okukandulwa po noshimaliwa.
Momumvo 2002 epangelo lyaNamibia okwa li lye ya po nedhiladhilo opo Aanamibia ya tameke okupewa omakwatho gopashimaliwa gokomwedhi ongomukalo gwokushunitha pevi onkalo yoluhepo moshilongo.
Momumvo 2005 Ehangano hali ithanwa Social and Economic Justice Trust, olya kutha ko oshinakugwanithwa shokuhwahwameka edhiladhilo ndyoka molwaashoka anuwa Aanamibia oyendji otaya mono iihuna koluhepo.
Ehangano ndika olya waiminwa komahangano omakwawo ge na sha nonkalonawa nuuthemba wopantu ge li 36, ngaashi CCN, Legal Assistance Centre, noNational Youth Council, okutumbula po gamwe.
Momumvo 2005 omahangano ngaka oga tula kumwe oshimaliwa opo ga pe aakalimo yomOshivelo kehe gumwe N$100 ongomalolelo ya tale kutya otashi ya kwathele ngiini.
Iizemo oya li iiwanawa lela, aantu oyendji okwa li ya longitha iimaliwa shoka okutota uungeshefa wawo, okulanda iikulya, nokwiikwatha moompumbwe dhawo dhilwe. –mrndeumaneraycharles@gmail.com