Ehangano leeshi ledina Brama Brama ola yandja oitungifi kendiki ha li tonatele ounona veefiye noshoyo voukwanaluhepo li li kEndola moshitukulwa shaHangwena. 

Endiki e li la shivika nawa nedina Hofen Kembudu Foundation ola pewa oitungifi ihapu ya kwatela mo eedopi 13 000 neesamende 110. 

Omukulunhu noku li omutotipo wendiki e li Regina Ndapewoshali Haikali okwa ti pendiki ope na ounona 87 omanga ounona 56 ove li momuhandjo. 

Okwa ti omwaalu wounona paife owa wedelwa osho shi li eshongo linene molwashi okwa pumbwa okutunga onhele ya kula. 

“Paife ohatu ka tunga etungo la kula mwa kwatelwa omuhandjo wokunangala ounona,” ta ti. 

Haikali okwa pandula ehangano loBrama Brama Fishing Company molwashi paife itava kala vali va taalela eshongo lonhele yokukala ounona vahapu. 

Okwa hokolola ta ti pendiki e li ola nuninwa eefiye nounona voukwanaluhepo, ile ounona ovo ina va alika vali kovadali vavo. 

Okwa weda po ta ti endiki lavo oha pa tambulwa ounona okudilila kovanafikola ile kovalihongifi ovo ve na ehalo lokushuna mofikola. 

“Otu na ounona vamwe va dja kovalihongi ve li koiputudilo ya yooloka. Ounona vetu iha va ningilwa okatongo molwashi endiki e li ola nuninwa ounona aveshe,” ta ti. 

Haikali okwa indila kwau e na ehalo lokuyambidida endiki lavo opo a kwatafana naye. 

-fhamalwa@nepc.com.na