Bukalo – Likwambuyu wa Zwelopili ya Libaka za Litolopo ni Matakanyani, Peya Mushelenga, ukupile kamaiso ya Katengo ka Munzi wa Bukalo kuambuka kuitwanisa nikuli bakumalele kulwanela kutisa zwelopili kwa Bukalo, ili teñi likwambuyu nanyazize bayemeli kakusatisa zwelopili. Nabulezi manzwi awo kanako yakukwalula simubuso ofesi ya munzi wa Bukalo. “Ki kwabutokwa kuli luzwiseza pata kozo kakuba bayemeli ni babeleki, ili kuli lusike lwatepelela mwa milelo yaluna yakusebeleza sicaba. Luswanezi kuambuka kuitwanisa mi lubone kuli lueza misebezi yaluna,” nekubulezi Mushelenga.
Kanako yakukwalula simubuso muyaho, bazamaisi bamunzi wa Bukalo niba Katengo Kasikiliti nebabilaezi kuli kubile nitiyeho mwakutisa zwelopili kwa katengo kamunzi. Kono Mushelenga naize kutepelela kwa zwelopili kuswanezwi kulimbwa kwa bazamaisi bakatengo kamunzi, ili bao naize habasebezi katata kutisa zwelopili kwa Bukalo. “Musweli kubilaela kuli tolopo ye nehulisizwe kanako yeswana ni Nkurenkuru, nikuli Nkurenkuru seli famayemo akatengo katolopo kono mina musali katengo kamunzi. Mafosisa awo atisizwe kimina. Hamusafi buikalabelo kaputako. Kaseo mufilwe. Hamusakupi tuso kwaliluko, kuli mukone kuhula,” nekubulezi Mushelenga.
Nahatelezi kuli kitakazo yahae kuli katengo kamunzi kahule kapili kuba katengo katolopo. Mushelenga napatuluzi hape kuli Katengo Kakabona za Masheleñi a Muuso kuzwelela kwa Ndu ya Milao, nekamutaluselize kuli ba Bukalo habafingi lipiho zamasheleñi. Kamaniti muswanezi kusebeza katata kubona kuli mulatelela milao ye ama masheleñi asicaba. Muyaho noyahilwe fasinyehelo yamasheleñi afita fa bolule bamashumi amalalu ka aketalizoho, mi Mushelenga nahatelezi kuli pulukelo yamasheleñi awo ne ezizwe, kulumelela babeleki kuli babelekele mwa muyaho sakata nikuli basebeleze sicaba katundamo ni ciseho.
Hanabulela kwamukopano oswana, mubusisi wa sikiliti sa Zambezi Lawrence Sampofu niyena naelelize katengo kamunzi kuli ka ambuke likomano, mi naize likomano zeo likona kutisa busholi. “Kiñi hamuitwanisa? Mwalwana kakuli peleko haisikafiwa muzwale wahao. Mwalwana kakuli peleko haisikafiwa wahabo mina. Kono haiba inge mulatelela milelo yelelilwe hande lika likazamaya hande,” nekuelelize Sampofu.
Katengo kamunzi kabile nilikomano kwamulaho, zene lili mwahala yanali muzamaisi wa katengo kamunzi Martin Limbo ni Muinasipula wa Katengo Charles Siyauya. Bubeli nebapalelwa ku utwana mi Siyauya nanyazize Limbo kuli naikezeza lika asikalumelelwa kikamaiso. Limbo yena nanyazize Siyauya kuli kilisholi nikuli nasamubelekisi hande. Likomano zeo nelitisize kuli Limbo asiiswe musebezi, mi kanako yacwale uile kwa khuta yeyemela babeleki kuyokwalula muzeko wakuzusiwa musebezi kanzila yesiyo hande, mi muzeko ukakena mwa khuta la 29 kuisa la 31 kweli ye.