BUKALO – Katengo ka Munzi wa Bukalo katalimana ni butata bwa masheleñi bobutuna, kungelela cwalo tiyeho yakulifa masheleñi kubabafa lisebelezo zeñwi, lituwelo za ba beleki ni kulilimaniswa kwa tifo ya lisebelezo zamakete ababeleki. Zeo ni haliliteñi muzamaisi wa katengo ka munzi wa Bukalo Anna Sazita nasepisize kuli basweli kusebeza katata kutatulula butata bo.

 “Kulifa babalufa lisebelezo zeñwi kona nto yabutokwa hahulu, haluzwelapili kutatulula butata boluli kubona kapilipili. Kasamulaho akuikambota ni likolo koluwela, neni lemusizwe kuli kupo yaluna yakulifa babalufa lisebelezo inyatezwi, kono nelukupilwe kutahisa litaba za panka yaluna kuli tifo iezwe. Kasamulaho akunyatisisa litaba kaufela, luka bona kuli masheleñi akauhanywa hande kuli kusike kwaba ni ba ba sika lifiwa,” nabulezi. 

Zeo litaha kasamulaho babeleki babañwi ba katengo ka munzi wa Bukalo neba bilaezi kuamana nikupalelwa kwa katengo ka munzi kulifa ba bafa lisebelezo zeñwi. Kuzwa kweli ya Liatamanyi katengo ka munzi nekasika isa masheleñi ane kapumela babeleki bakona kokuswanela. Kalibaka leo, lisebelezo za makete kwa kampani ya NMC neli lilimanisizwe likweli zetalu zefelile.

Mwa kweli ya Yenda, babeleki nebabile ni mukopano kukandeka butata bo. Babeleki bane ba bilaela nebaize muinasipula wa katengo ka munzi Simataa Mubonda nakile asepisa kuli kuka ezwa mukopano oka tatulula butata, kono kutisa cwale hakuna tatululo yefumanehile. Katengo kakayemela babeleki ba sicaba mwa ketelelo ya muinasipula wa mutayi Oscar Mukelebai nikona neka likile kono nekupalile.

Katengo kamunzi hape katalimana ni butata bwa kusalifa babeleki kanako. “Lwa ziba butata bo, mi lusweli kusebeza katata ni likolo kuli butata butatululwe,” nekubulezi Sazita. Butata kaufela bo, ni hamuliteni, Sazita nasusuelize sicaba kuzwelapili kusebelisa lisebelezo zakatengo ka munzi. “Luitama kubona kuli lika za cinca, lwa itumela kwa tuso ya sicaba mwa nako ye tata ye. Nisusueza bayahi kaufela kulifela lisebelezo kaufela zefiwa kikatengo kamunzi, mitelo, mezi ni kulifela maino abona. Lusweli kusebeza katata kubona kuli lusebeleza hande sicaba sa luna,’’ nekubulezi Sazita.