WINDHOEK – Likolo la Njimo, Mezi ni Mishitu litumusize ku nanulwa kwa mihato ya silelezo ye nebeilwe mwa sikiliti sa Zambezi kuamana ni butuku bwa Taku ni Mulomo bone bukulubelwa kubutuka mwa kweli ya Muyana unumwaha.
Ni fitisa buitumelo kwa linjimi ba silalanda bao ne baitahanezi ni kuba ni manyamenyame kukona ku lutusa kubeya mayemo mwa nzila yende,” kwa bulela Dr Johannes Shoopala, mueteleli swalelele wa ba mutai o bona za silelezo ya limunanu. “Butuku bwa Taku ni Mulomo bone bukulubelwa kuli nebu zuhile kwa sipango sa Ihaha nebukonahezi kubulilimanisa mi mihato ye neibeilwe kuamana ni kubutuka kwa butuku i chimbulezwi mwa halimu kutateka ona fa,”kwa talusa muňoli ya inelezi wa Likolo la Njimo, Mezi ni Mishutu, Joseph Iita mwa sitatimende se sisulilwe yona biki ye. Sipango sifumaneha mwa silalanda sa Kabbe libima ze mashumi a silela ni mashumi a mabeli Mboela-Upa wa Katima Mulilo. Iita u zwezipili kutalusa kuli kulilimaniswa ku latelelwa ki mipendo ye neingile sibaka ya likomu ze fitelela likiti ze mashumi a mane ni likiti ze ketalizoho mwa sibaka sa Ihaha sa butuna bwa libima ze mashumi a mane a likilomita ni mihato ya kutatuba limunanu ni kuhanisa likomu kuikamaela mutakafululele sikiliti kaufela sa Zambezi. “Akuna bupaki bwa butuku bobuyambalakani kuzwelela piho za pili”, kwa zwelapili kubulela Iita. Ku nanula mayemo a kuhanisa ki kutalusa kuli libaka zenebeilwe mwa silelezo ya butuku bone bubutukile likwaluzwi mi kuzamaisa limunanu za litaku zeswana sina likomu, lipuli, lingu mane ni lifolofolo za naheni lilumelezwi mwa sikiliti kakuba ni liňolo lelilumelela cwalo laba mutai o bona za silelezo ya limunanu. Ku nanula mayemo ao a lumelela ku zamaisa cwalo nizeo lipangilwe fa lifolofolo ni lichalano kuzwelela mwa sikiliti kakuba ni liňolo lelilumelela kueza cwalo.
Kutwela nako kaufela kukaba teni kualabela kapili-pili kwa lisupo za butuku haiba inge buakalezwa kuzuha. Balimi ba susuezwa kubiha kabubebe lisupo za butuku kwa liofisi zaba silelezo ya limunanu zeli mabapa ni bona kuli kube ni lipatisiso’, kwa talusa Iita. Muňoli ya inelezi a tatulusa kuli mipendo ya butuku bwa Taku ni Mulomo ni Maswafu ya makutela i tabe itatekile mwa sikiliti kaufela sa Zambezi kukala 20 Yenda kuisa kala 26 Njimwana 2014. Kakuya ka Iita mungendenge u tangelela likomu ze nependilwe libima ze mashumi a mane kuzwa Ihaha mi litangelela kubatisisa ni matuku amamwi cwalo.