Silozi

Muuna walilimo zemashumi amabeli kazeketalizoho natabilwe nikubulaiwa, kasamulaho aku akalezwa kikumulikana hae kuli nasweli kuca linja mwahae. 

Sikiliti sa Omusati sitalimana ni butata bwakukwalela babalibelezi kuzekiswa mwasikiliti. Zeo nelipatuluzwi kimubusisi wasikiliti Erginus Endjala hanafitisa zibahazo yamayemo asikiliti Labulalu. 

Muzamaisi yomuhulu walikolo la njimo Ndiyakupi Nghihituwamata, ulemusize kuli likolo likayaha munshini omutuna wakubakanyisa nama, wamasheleñi alikana bolule bashumi amalalu ka baketalizoho (N$35 million) mwa Katima Mulilo. 

Kasamulaho asililo sa sicaba hala babanca baba sabeleki kuamana ni litaelo za sisole sanaha (NDF) hala makete, zibo, ni nikauhelo yalilimo kubaba kenywa misebezi, likolo neli ikalabezi Labulalu, kakubulela kuli sisole hasiswaneli kuboniwa kuli kisimbule samisebezi. 

Sipokola sanaha Namibia silaezwi kiKhuta Yepahami kukutiseza muzamaisi wasipokola, yana hapelelizwe kutuhela musebezi mwasipokola mwasilimo sa2019 amano hana kuyobelekela kwaMariental.

Likwambuyu waSilalanda, Mishitu ni Bupoti, Pohamba Shifeta, uelelize limembala zalibakanyana zapabalelo yalifolofolo kuambuka kuzuma isi kamulao nikusinyasinya masheleñi. Nabulezi hape kuli likolo lisinuzi kubateñi kwakuzuma isi kamulao mokuitengile limembala zalibakanyana zapabalelo zalifolofolo. 

Musalimuhulu walilimo zemashumi asilezi kazesupile, yalata banana, uneuzi likubo zemyanda yemilalu, kuneulela banana babapila mwakomponi yaOkahandja Park, kubabukeleza kwasilami sesi kwauzi tolopo ya Windoko. 

Mapokola bafile mamela hala mabisiketi akolomozwi, nikubeya mwateñi matokwani. Mamela itaha kasamulaho muuna walilimo zemashumi amabeli kazetalu natamilwe la 13 Mbuwana unumwaha, kakukulubelwa kuli nafumanwi alekisa mabisiketi amatokwani alikana 103, ateko yelikana N$2 000.

Muuna walilimo zemashumi amane kazelobañwi, ili mubeleki wakampani yaAMTA mwa Katima Mulilo, nahanezwi kulibelela muzeko wahae kwande, kasamulaho akubonahala mwakhuta yenyinyani yatolopo, teñi utalimana ni likakalezo zabulyangelino.

Kubonahala kuba nisepo kwabalimi babafumaneha mutulo wanaha, ili kanako yacwale bakauhezwi kwanaha kaufela hala litekiso zanama, haiba manzwi akampani yaMeatco inge atalelezwa.