Omunashipundi mupe womalelo opamufyuululwakalo moNamibia okwa ti otaka lalakanena okukandula po eenhamanana odo di li pokati komalelo opamufyuululwakalo.
Chief Immanuel Nu-axa /Gaseb okwa ti unene tuu eenamanana deengamba domadu moshitukulwa shomonooli osho shimwe ta ka kala a tula tete moilonga shaashi okwa didilikwa omalelo opamufyuululwakalo monooli ha kala ta kondjele omadu.
Edi Chief /Gaseb okwe di popya pefimbo kwa li a ninga eenghundafana naKundana konima eshi a hoololwa a ninga omanashipundi womalelo opamufyuululwakalo moNamibia komutumba wa li kEenhana oshivike sha dja ko.
Okwa kunghilila omalelo opamufyuululwakalo opo a kale ta longele kumwe mokukandula po eenamanana deengamba koikandjo yavo.
“Ovaleli vopamufyuululwakalo naa kala alushe ta kwatafana nombelewa yange ngeenge ta nyengwa okukandula po eenamanana deengamba domadu ta kondjelwa,” ta ti.
Chief /Gaseb okwa denga omufindo ta ti ovaleli vopamufyuululwakalo ta longifa oulingilingi naa kale a lopotwa diva kombelewa yaye ile kombelewa hai longo noulingilingi moNamibia.
“Oshiwana nashi kale sha manguluka okulopota omuleli keshe wopamufyuululwakalo ta longifa oulingilingi momidingonoko davo. Onghee ita di ka fiya emanya la londa ku li kwao kombinga yomalelo ta longifa oulingilingi,” Chief Gaseb ta ti.
Okwa ti ota ka longa nondjungu efimbo keshe opo a dule okuyakula oshiwana nokukala a kaleka po ekwatafano liwa noshoyo okuhambula po oshikondo shomalelo opamufyuululwakalo moNamibia. /Gaseb okwa pingana po nakufya Immanuel Kauluma Elifas ou a xulifa momudo 2019 nokwa li oye omunashipundi womalelo opamufyuululwakalo.
Okwa li tava kondjifafana momahoololo nohamba yelelo lOvandonga Fillemon Shuumbwa Nangolo ou a dja mo nomai 41 omanga Goseb okwa dja mo nomai 59.
Moshipopiwa shaye minista yeedolopa nehambule po lokomikunda Erastus Uutoni okwa kunghilila omalelo opamufyuululwakalo opo a twikile nokulongela kumwe noshoyo okukula e na ekwatafano liwa.
Uutoni okwa ti ota ka longela kumwe naChief /Gaseb kombinga yomikundu da taa lelwa komalelo ayeshe opamufyuululwakalo noshoyo nghee epangelo ta li ka yambidida omalelo moshilongo.
Okwa weda po ta ti omalelo naa kale ta topolafana mayelele noshiwana tete manga ina kufa onghatu ngaashi oku eta po omalunduluko ngaashi oifuta ile okutendulula omadu.