Sîsenao-i xa xoahe hâ
ǀAEǁGAMS – Chinese !Hūǂnûǁkhaeba-aob Namibiab !nâb, Zhang Yimingi ge ǂoago wekheb Denstaxtsēs ai ǁnâuguxoaǁguiba gere xoa!gao, ǁîb !nâb !nona ǂhanub skolga nēpa xu nî domdorese ge ūǂgā!nâba, !gōsase ǂhâsib !nâ hâ ǀgôarona nî huise. Zhangi ge sao ra skolgu di skoldan ǀkha ge ǀhao hâ i: Chairman Mao Zedong ǀGapi Skoli, People’s ǂAmskoli tsî Monte Christo ǂAmskol hâga. Zhang Yimingi ge nē ǀhaos tawa ǁnâugusa ge xoa!gao nē !nona skolgu tawab Chinese !Hūǂnûǁkhaeba-aob Marisihuiba nî māsa.ǁKhātib ge ǁîba skoldanana ge mîba, !uru ǂâibasens nē huib dis Harambee Ai!gûs ǀAweǁguib HPP) !nāmab !nâ nî dīhesa, in nēs !nâ-ū skolǀgôan nē !nona skolgu dina ǂgaoǂgao!nâhe !garise sîsen tsî ǁîn ǁkhāǁkhāsens !nâ !gâi ai!gûsa nî dīsa, ǁîn ga ǀgâsa tsî ǂkhawusa khao!hūga ūhâ xawe. !Aruǀîb ge Yimingiba ge mî, ǁîb kaise nî !gâiaǂgaosa noxopan ga ǂgui ǀgôan tsî omaride nē hui bra mābahe proxramma xu nî domdores kara tsî nē mûmûsase ra ǀomkhâi sîsenǁareb hîa Chinab tsî Swapos hâra ǁaegu 1960 kuriga xu !gôaxab tsîna ai!âb ǁga a ǀgaiǀgaisa. George Frederick Lowb, skoldanab Chairman Mao Zedong ǀGapi Skoli dib, ge ge mî ǁîb ge ǀnai !gâise ra dī skoli !nâ ǀgôana a ǁgoaǂuisa in !garise noxopa sîsen tsî nē proxramma xu !gâina ǀama. Patrick Xoagub, skoldanab People’s ǂAmskoli dib, ge ǂhâǂhâsasib Mandarin gowab diba ǀgaisa koasa mā tsî ge mî, ǁîb !goaxa ǁaeb !nâ ra ǂâi!nâǁguisa nē gowaba ǁîb skoli !nâ ǂgâxa-ūsa. !Aruǀîb ge Xoaguba ge mî ǁîb khoe!gâgus ai !gao!gaosase Chinab !nâ hâ skolga sîsenǁareb !aroma ra ǂhâbasa. Elizabeth Murangis, skoldanas Monte Christo ǂAmskoli dis ge ǁîs ǀkhāba xu ge mî, ǁîs ǁkhoreb tsîn asa Mandarin gowaba ǂgâxa-ūsa. ǀAms aib ge !Hūǂnûǁkhaeba-aob Namibiab !nâb, Zhang Yiminga ǁîb di ganganxasiba nē skoldanan !oagu gere gowaǂui ǁîn di sîsenǁareb hîan Chinab !hūǂnûǁkhaebas ǀkha ūhâsa tsî ǁîna ge mîmaiba, ǁîb nî ǁawoǁawosa ǁîn di ǁkhoreb Mandarin gowaba ǂgâxa-ūs diba dīǀoaǀoasa.