ǂUrusib ministers, Dr Esperance Luvindaos ge  ge ǂhanusise choleras di khoraǂuisensa ge ǂan!gâ, Opuwos, Kunene ǀkharib !nâ ǁgoes tsî ǁîs ǂnamipeb !nâ. ǁNāpa ge a !nurihe ǁkhaisa !nae!khaide xun !nanina a ǀgui omaris dise.

Ministers ge mîs ge, !haese nē mâsiba !aruǀî khoraǂuisensa oe-ams ases ministerisa ǀae!khōs !nande ǁnā tsâǀkhāsa !âgu ǀkha sîǂui in !haese ǀae!khōde mātsoatsoa, mās kōses !hase ra ǂapaǂoasa ôa!nâ tsî mâ ǀkhaub ain ǁkhae ǁkhās ǀgaugu tsîna ǂgâxa-ū. !âide dīs !aroma a ǂhâbasa ǀae!khōs xūn ge go ǀaro!nâhe, ǁawoǁawos ­ǁnāti ī hāǀaro ra !nae!khaide kaise !haese ǂanǂui tsî !hae ǀgaub ai a sîsenxa dōǀgaugu ǀkha oresa māsa.

Choleras ge ǀgaisase ǂhīguhes ǁkhāsiba !khōǂgā hâ ǁōsa hîa ǀurisa ǁgam-i !nâ-ū a ǂhīguhe ǁkhāsa, aiǁgause ǁgam-e ās tamas ka i o ǂûn !nâ-ū, ǂkhari-om mâsigu tsî ǁan!om tama is ka hâpa. Nē mâsib ge ǀgaisase ra !khoe !nāb ǁgamǀorosisa a !aroma ǁ­khā tsî hana i ǁ­aeb ai tsî ǂhanuse ǀae!khōhe tama nî īs kara, o ǁōb tsîna a !aroma ǁkhā. “13 Gamaǀaeb 2025 dis ais ge ministeris ǂurusib disa, ǀhûhâsib tsî Hoa !Hūbaisi ǂUrusib !Nans (WHO) tsîna hâ ǁkhā a khoraǂuisens choleras dis, Opuwos ǀkharib !nâs ǂnamipe ge ^ǂanǂan, tis ge ministersa ge mî. Dr Luvindaos ge ge mî, nē ǂanǂansa ge !nape!nape!nâ !khais ge, haka khoen (!nona ǀgôan tsî gui kaikhoe-i) tsîn ge Opuwos ǀKharisi ǀAeǁgâub tawa cholerasa ūhâs !khōǂgā hâ ǁgauǁgaudi ǀkha a ǂanǂuihes xa. “Nē haka khoen ge ǀgui omarisa xu ra ǂoaxa. !Hau!hausase-i ge ǀgui khoe-e sorosa kai ǁgam-e ǂoa!nâs xa !aromahe hâse a ǀomǀuni hîa. Nē ǂoa!nâs ge mâtikōseb nē mâsiba a ǁkhōǁkhōsa !khaisa ge !gāsa kai tsîb !hae huiba ministerisa xu a ǂhâbasa !khais tsîna, îb nē mâsib ǀhûhâsib ǂurusib !aroma ǂâiǂhansens ase ība ǂâisa ǂnûi-aihe,” tis ge Luvindaosa ge mî. Nē !nae!khaidi ge WHOs tawa !hū!nāsise ǂhīgusase a !nurisa. WHOs di ǂgaoǀkhādi !oagus ge ǀgui choleras !nae!khaisa khoraǂuisens ase ra ūhe. Nē ǁkhâb di tsoatsoas, 4 Gamaǀaeb dis ai gu ge 20 !kharaga !hūgu hîa choleras xa tsâǀkhāhe hâga, ǂnûsa ge ūhâ i, Africa Centres for Disease Control and Prevention (Africa CDC) di ǂgais ai oe-ams ase. Nē ǂnûs ge Zambiab presidenti tsî AUs Hakainde Hichilemab tsîkha !khōdanas !naka ge hâ i. Hichilemab ge ge mî, ǁîb nî !hūgu nē a tsâǀkhāsagu !nâs cholerasa ǁkhaubasa mâti ra ai!gû !khaisa AUs ǀHûsa !nuri-oaba !khaisa.