Auleria Wakudumo

Eeshoke Chula Chula odo di li pombada yoshitaafula molixa yopombada noitwa 30, a shikulwa kuMighty Gunners e na oitwa 27 konima youdano wexuliloshivike. Mighty Gunners okwa denga Unam mOlomakaya, ashike mOsoondaxa okwa xulila mounyengwi eshi a dengwa yimwe monola koUnam mOvenduka. Chula Chula okwa pondola okuweda ko koitwa yaye eshi a denga oJulinho Athletics noRundu Chiefs mexuliloshivike.

Meenghundafana naKundana, omupopiliko wEeshoke Chula Chula Felisberto Da Silva okwa holola kutya oudano pokati kaChula Chula naJulinho owa enda nawa.

Okwa ti opa li tapa ti pwaka shaashi aveshe ove na ovadani veshi okudana etanga moshili.

“Fyee katwa li twa hala okudengwa shaashi inatu hala okudja ko konomola yotete omanga Julinho naye ina hala okudengwa shaashi oye e li koxuuninwa onghene ota kendabala opo aha we mo molixa,” Da Silva ta ti ngaho.

Da Silva okwa ti ova tula mo tete mominute 22 omanga nokuli inava ya pokafudepo. Opo ve li po, Julinho naye okwa ti ita dengelwa meumbo, yee okwa ekela mo osho opo va kele ve na imwe muimwe. Okudja pokafudepo, ovamati vaChula Chula ova dja po va komandekeka. Okamati oko haka djala okambidja 11 kombuda oko ka pitila okudja pokafudepo. Inapa pita efimbo, koo okamati konomola 8 nako okaya mo onghala osho sha eta Chula Chula a kale ena nhatu muimwe.

Da Silva okwa ti kexuulilo lela, Julinho okwa shikilwa etanga olo hali ifanwa ofree kick ndele ta tula mo okoola osho sha eta va kale vena mbali munhatu fiyo oudano wa dja pondje.

“Otwa pandula aveshe ovo ve hole Chula Chula shaashi ova kongoloka okudja keenhele di lili nodi lili opo ve uye va tale eshi Eeshoke tadi va hafifa,” Da Silva ta ti ngaho.

-awakudumo@nepc.com.na