WINDHOEK
Ekuyunguto ndyoka tali inyenge ngashingeyi mongundu Congress of Democrats (CoD) olya adha ondondo ompe konima sho Okomitiye yOpashigwana yongundu ndjika ya ningi etokolo okutitha iilyo yayo yomOparliamende oshowo iilyo yimwe yomOkomitiye yOpashigwana yi nasha nEunganeko.
Poshigongi shoka sha ningilwe mongulu yimwe pomatungo gOparliamende mOlyomakaya, Okomitiye yOpashigwana oya tidha omukalekipo gwelandulathano mOmutumba gwOpashigwana, Nora Schimming-Chase, ngoka a li nale amushangandjayi Kalla Gertze oshowo Elma Dienda.
Momukandakundaneki ngoka gwa pitithilwe mOsoondaha ya zi ko, Omupresidende goCoD, Ben Ulenga ota ti Okomitiye yOpashigwana oya yakula omushangwahokololo gu nasha nomaihumbato giilyo yokangundu hoka ke na elalakano okweeta evundakano mongundu.
Ulenga ota ti Okomitiye yOpashigwana oya kutha ko neitulomo enene oonkatu nomaihunmbato giilyo yimwe yongundu mOparliamende naakalelipo yoshigwana, mboka ya tokola okunyateka edhina ewanawa lyoCoD.
“Okomitiye oya ningi etokolo kutya omaihumbato gawo kage na we ongushu okukala nuukwashilyo woCoD, nongundu oya kanitha einekelo lyayo maakalelipo mbaka yoshigwana, nOkatendo okati-5, ontokolwa 5.2 oka gandja uuthemba okutidha aantu mbaka mongundu.” Oshikwawo, Okomitiye yOpashigwana oya tokola okutidha mongundu “iilyo ayihe yOkakomitiye kOpashigwana Keunganeko” ngaashi Ignatius Shixwameni, Herbert Schultz naPauline Dempers.
Iilyo mbika oya tseyithilwe kuShixwameni poshigongi shiikundaneki momasiku 8 Mei 2007 kutya oonkatu dhawo odhi li ompinge noCoD.
Okomitiye yOpashigwana natango otayi indile omupresidende goCoD oshowo aanambelewa yalwe ya tsikile okugamena omauwanawa gwongundu.
Okomitiye ndjika otayi ti iilyo ayihe okwa tegelelwa yi longe okupitila momitungilo dhongundu oshowo ekotampango lyoCoD, ndele kashishi okupitila miikundaneki yoshigwana.
Pokati mpoka, okangundu hoka ka ninga oshimpaga moCoD, hoka ki iluka koyene “oCoD yOmawi Ogendji (CoD Majority” nako oka ningile oshigongi mOlyomakaya ongula poR