Kakukutu komatanga opolifi yaNamibia Inspector General Joseph Shikongo okwa tanga ependafule, komufala mukulu wopolifi Simeon Shindinge ta ti okwa li omulumenhu a longa noudinini okukaleka po eameno loshiwana.
Simeon Shinedima Shindinge okwa xulifa momafiku 24 Juli koshipangelo shopaumwene shoLady Pohamba koWindhoek.
Okwa xulifa mepupi lomido 64.
Okwa ya moshipundi shopendjela momudo 2020 pefimbo kwa li eli komufala koshitukulwa shaHangwena.
Shindinge okwa wilika opolifi koikondo ya yooloka onga omukulunhu wopolifi koitukulwa shaHangwena, Omusati noshoyo omukulunhu koshikondo shokukonakona oimbuluma koshitukulwa shaMaheke.
Shikongo okwa hokolola ta ti okwa shaneka Shindinge pefimbo lokondjelomanguluko momudo 1989.
“Shindinge oye umwe womovapolifi votete va waimina etanga lopolifi nokwa li va tumwa kondje yoshilongo komadeulo,” ta ti. Kakutu kopolifi okwa ti Shindinge okwa li koAngola ta kwafele Ovanamibia pefimbo lekondjelomanguluko.
“Okwa dana onghandangala ya kula koshikondo shopolifi. Okwa longa nelitulemo okulwifa oimbuluma monooli pefimbo kwa li a pewa oshinakuwanifa shoukomufala kOhangwena nOmusati,” ta ti.
Okwa ti Shindinge omulumenhu e hole elandulafano, omunambili, e hole oilonga tai longwa pefimbo noku na olukeno noshiwana. Okwa weda ti Shindinge okwa li yoo vali oshilyo shoSwapo molwashi oye umwe vovanambelewa wopolifi kwa li va tumwa kongudu yoSwapo kondje yoshilongo.
Omonakadona Suama Shindinge okwa hokolola ta ti xe oye okwa li ongudi ya kula mofamili yavo molwashi okwa li e hole okuyambidida oivilo yomepata lavo.
“Tate ka kwa li e na okatongo. Okwa li e hole okuyambidida nokutekula keshe umwe mepata letu,” ta ti.
Okwa ti alushe ngeenge mofamili yavo muna oshivilo Shindinge oye a fiki tete nokuyandja omayelele nokuyambidida. Suama okwa ti xe okwe va tekulila oukriste, okufimaneka ovakulunhu noshoyo okuholafana.
“Tate okwa fiya po omwaka wa kula mepata letu. Otwa ka nifa omulumenhu omunambili omuyambididi wovanhu,” ta ti. Shindinge okwa fiya po ounona vaye vavali nomukulukadi waye. Omalongekido oshivilopako shaye oku li metifa keumbo laye komukunda Ohama koshitukulwa shaMusati.