Pwaa na ongalo yomOsoondaha, oongeleka odhindji moshilongo odhi uvite uudhigu wompumbwe yoshimaliwa konima sho noongeleka dha kunkililwa dhi pate omolwomukithi gwoCovid-19. Omumbiishofi gwongeleka yaAngelikana Luke Pato okwa ti ethimbo efupi natango okupopya kutya iiyemo yongeleka oya gumwa ngiini sho omalongelokalunga ga tula mo manga ombiliki onga omukalo gwokukeelala etaandelo lyomukithi nguka gwocoronavirus. Pato ta lombwele oshikundaneki shoNew Era kutya konima yomwedhi otaya vulu okumona kutya osha guma ngiini ongeleka- ashike mopaife kape na sha manga.
“Katu na omishangwa natango tadhi vulu oku ulika kutya inatu futa iifuta yetu yokomwedhi. Omasiku inaga thika natango po14, ngiika ngele owa pula konima yomasiku 30 otatu ku pe eyamukulo lya yela nawa. Katu na shoka hatu futu esiku kehe nenge koshiwike. Kape na shoka tashi ulike pompito ndjika,” ta ti ngaaka.
New Era oya li ya ningi ekwatathano naaleli yoongeleka dha yooloka ya gandje omaiyuvo gawo shi na sha nkene iiyemo yongeleka ya gumwa oshoka ngashiingeyi kape na we manga iimaliwa yongalo yongeleka, okufutila omashasho, ootundi dhepukululahombo osho wo omakoleko omolwomukithi gwoCovid-19. Sho oCovid-19 ya tukuka, oongeleka odhi ihulu okugongala momasiku 15 Maalitsa.
Pastoli Fred Joseph gwongeleka yedhina Apostolic Faith Mission (AFM) River of Life okwa ti shika otashi ki iholola ashike kehulio lyomwedhi nguka.
Joseph ta ti oongeleka odhindji odhi ikwatelela mongalo ndjoka hayi umbwa oshiwike kehe opo yi fute aaniilonga.
“Otu na ehala enene. Otu na oombelewa, endiki lyaagundjuka, Osikola yOsoondaha osho wo ongeleka. Otu na omeya, olusheno, osho wo aaniilonga mboka haya futwa,” Joseph ta ti ngaaka. Ta ti oongeleka odha kala nokuyambidhidha omagumbo gaakulupe, uunona wu li mompumbwe, aakulupe nayilwe omwedhi kehe naashika otashi ka hulila
Pastoli David du Plessis gwongeleka yedhina Gospel Mission okwa ti oye na iilyo mbyoka yi na eyitaalo lya kola nohayi umbu ongalo mokambo kombaanga kongeleka omanga yamwe taya eta kegumbo lye.
“Inashi tu guma lela ngele tashi ya pashimaliwa,” ta ti ngaaka.
Reverend Andreas Biwa gwongeleka yoAfrican Methodist Episcopal (AME) okwa ti oya dhengwa ya luluma lela.
Omumbiishifi gwoReformed Evangelical Anglican Church Namibia (Reach-Na) Lukas Kaluwapa Katenda okwa popi kutya oshi iwetikile kutya oongeleka odha gumwa konkalo ndjika.
“Nonando hatu ti kashi shi oshinakugwanithwa shongeleka okukala nomatungo omanene, oto vulu okukala netungo lyi shi okutalika oshoka uuna onkalo ngandjika ya holoka, otashi kala omutengi omudhigu na kape na iiyemo okufuta notashi ka etela ongeleka oondjo,” ta ti
ngaaka.