Okupatelela oshilongo otaku endele pamwe noudjuu wopaliko, no itaku dulu ku kale efimbo lile. Edi, omupresidente Hage Geingob okwe di popya mEtitatno.

Eshi a vilikula oshiwana, Geingob okwa ti Oshitukulwa shErongo otashi twikile oku kala pondodo onhinatu yepato oyo kwali ngeno i na oku ya paexulilo nena. Oitukulwa ikwao ili 13 yo otai kala pondodo onhine. Geingob ta ti omilandu odo dili moitukulwa yeedoolopa ngaashi oWalvis Bay, Swakopmund noArandis otai twikile fiyo okomafiku 31 Aguste, omanga onghalo yoshilongo ashishe tai ka talululwa momafiku 17 Sepeteba 2020.

Etalulolo eli paife ola kwatela mo okuninipika omuvalu ile omangudumano ovanhu okudja povanhu 250 noku ya povanh 100, eendingosho neestauranda onghene tadi twikile oku landifa kovanhu tavai, inava pitikwa oku kala omutumba, omanga eehotela tadi ka efiwa okulandifa omalodu, sheli kolela komalandulafano oo a tulwa po, monghatu onhine. Omaudano otaaka efiwa, ashike onghee ngoo inaa efiwa oku kala e na oonakutala va ngudumana –omupresidente ta ti.

Geingob ta ti vali elongo loshipala noshipala kounona veli moPre-primary fiyo oGrade 9 nalo ola kalekwa oule womafiku 28, okudja nena. Ovanafikola voGrade 10, 11 no12, vo ova pitikwa okutwikila neetundi. 

“Aa omatokolo madjuu shaashi otu udite kutya onghalo oyo tuli muyo oya nyika oshiponga ngahelipi,” Geingob ta ti. 

Ta ti epangelo otali ka longifa ashike epato lafilu filu ngeenge  shi wetike sha pumbiwa. -Nampa